لاهوور شێخ جەنگی مانی لە خواردن گرتووە؛ دوایین زانیاری لەسەر دۆسیەکەی

لاهوور شێخ جەنگی، هاوسەرۆکی پێشووی یەکێتیی نیشتمانیی کوردستان و سەرۆکی بەرەی گەل، شەوی یەکشەممە 19ـی نیسان، راگەیێندراوێکی لە فەیسبووکی خۆی بڵاوکردەوە: "8 مانگە دوور لە هەموو نەریتێکی دامەزراوەیی و یاسایی بە ناحەق زیندانی کراوین".

لاهوور شێخ جەنگی لە زیندانەوە رایگەیاند: "بۆ ئەوەی دادگە رێڕەوی یاسایی خۆی بگرێ، تاوەکو ئێستا چاوەڕێمان کردووە، بەڵام دیارە گوشاری بافڵ تاڵەبانی، سەرۆکی یەکێتی نیشتیمانی کوردستان و قوباد تاڵەبانی، جێگری سەرۆکی حکومەتی هەرێمی کوردستان لە دادگە و دامەزراوەکان رێگرە لەوەی دۆسییەی سیناریۆکانی خۆیشیان بچێتە دادگەی تەمیز، بۆیە لەگەڵ کاک پۆڵاد [شێخ جەنگی لە زیندان] پێکەوە بڕیارمان داوە لەمڕۆوە مان لە خواردن بگرین تاوەکو ئەو کاتەی سەروەری یاسا لە دۆسییەکەمان بەدی دەکەین".

قادر ئاغا مەنتک، یەکێک لە پارێزەرانی دەستگیرکراوانی لالەزار، ئەمڕۆ دووشەممە بە تۆڕی میدیایی رووداوی گوت: "لە نیوەڕۆی دوێنێوە کاک لاهوور و کاک پۆڵادی برای مانیان لە خواردن گرتووە".

بۆ یەکەم جار لاهوور شێخ جەنگی لە 12-01-2026 برایە بەردەم دادوەر لە دادگەی سلێمانی، بەڵام دادوەر بڕیاری کۆتایی لە دۆسیەکەی نەدا و رایگەیاند، بۆ وردبینی دۆسیەکە رەوانەی دادگەی تێهەڵچوونەوەی هەرێمی کوردستان دەکرێت لە هەولێر.

پارێزەر قادر مەنتک دەڵێ: "9 جار لە دادگەی تێهەڵچوونەوە (تەمیز)ی هەرێمی کوردستان لە هەولێر، داوای دۆسیەی کاک لاهوورم بە فەرمی کردووە، بەڵام وێڕای بڕیاری دادوەری سلێمانی، هێشتا لە سلێمانییەوە دۆسیەکەی نەگەیێندراوەتە هەولێر".

ئەو پارێزەرەی لاهوور شێخ جەنگی و هاوڕێکانی دەڵێ: "دۆسیە دەبێ لە رێگەی پۆستەوە بنێردرێ. سەرم سوڕماوە دادوەرێک خۆی لە سلێمانییەوە هێناویەتی، ئەویش کۆپییەکانی هێناوە، کە دادگای تێهەڵچوونەوەی هەرێمی کوردستان کار بە کۆپی ناکات".

بە گوتەی ئەو پارێزەرە، دەبێ نووسراوە رەسەنەکانی دۆسیەکە بنێردرێ بۆ هەولێر و کۆپییەکانی لە سلێمانی بهێڵدرێتەوە.