رووداو دیجیتاڵ
دەستەی دادوەریی هەڵبژاردنی سەر بە ئەنجوومەنی باڵای دادوەریی عێراق، ئەندامێتیی دانا ئەحمەد مەجید، رێکخەری گشتیی بزووتنەوەی گۆڕانی لەو بزووتنەوەیە هەڵوەشاندەوە، ئەوەش دواى سکاڵایەکى (باڵى گردی زەرگەتە)ی بزوتنەوەى گۆڕان.
ئەو بڕیارەی دەستەکە، پێنجشەممە 23ی نیسان دەرچووە، لەسەر بنەمای سکاڵایەک کە باڵی گردی زەرگەتەی بزووتنەوەی گۆڕان لە دژی بڕیارێکی ئەنجوومەنی کۆمیسیاران تۆماریان کردبوو، کە لە 31ی ئاداری 2026 ئەنجوومەنی کۆمیسیاران دەریکردبوو، بڕیارەکە تایبەت بوو بە قبووڵکردنی ئەندامێتیی دانا ئەحمەد مەجید.
بەگوێرەی بڕیارەکە، ئەندامێتیی دانا ئەحمەد مەجید لەسەر بنەمای بریکارنامەیەک بووە کە نەوشیروان مستەفا، رێکخەری پێشووی بزووتنەوەکە پێی داوەو، لە دوای کۆچی دوایی نەوشیروان مستەفا لە 19ی ئایاری 2017، ئەو بریکارنامەیە پووچەڵ دەبێتەوە لەگەڵ هەر پاشهاتێکی یاسایی کە لەسەری بونیات بنرێت، بە ئەندامێتیی دانا ئەحمەد مەجیدیشەوە.
سەرچاوەیەکی بەرپرس لە بزووتنەوەی گۆڕان (باڵی گردی زەرگەتە) کە سکاڵاکەیان تۆمار کردووە، بە تۆڕی میدیایی رووداوی راگەیاند: تیمی یاسایی ئەو سکاڵایە و ژووری یاسایی تاوتوێی ئەو بڕیارە و لێکەوتە یاساییەکانی دەکەن و سەرەتای هەفتەی داهاتوو لە کۆنفرانسێکی رۆژنامەڤانیدا بە فەرمی دەیخەنەروو.
بابەتی پەیوەندیدار
کوردستان28/04/2026
وەزارەتی ئەوقاف: جەژنی قوربانی پیرۆز 26 یان 27ی ئایار دەبێت
کوردستان28/04/2026
دوو کەس لە پارێزگای ورمێ بە رووداوی هاتووچۆ گیانیان لەدەستدا
16ی شوباتی 2026، لە کۆنفرانسێکی بزووتنەوەکە لە کەرکووک، دانا ئەحمەد مەجید وەک رێکخەری گشتیی بزووتنەوەکە هەڵبژێردرا، بەڵام باڵی گردی زەرگەتە ئەو ئەنجامەیان رەتکردەوە.
لە بەرامبەر ئەو بڕیارەدا، بزووتنەوەى گۆڕان لە روونکردنەوەیەکدا رایگەیاند، گرێدانی كۆنفراسی گشتیی بزووتنەوەکە لە شاری کەرکووک لە رووی كات و شوێن و ئەنجامدانی رێکاری پەسندكردنی سەركردایەتی (جڤاتی نیشتیمانی) و، پەسەندكردنی پەیڕەوی ناوخۆ(دەستووری گۆران) دروست و یاساییە، هەروەک لە بڕیاری دەستەی دادوەریی هەڵبژاردنەکانی ئەنجوومەنی باڵای دادوەریی عێراق، كە لە 24ى ئادارى 2026 دەرچووە و ئاماژەی پێکراوە.
بزووتنەوەکە دەڵێت: "لەو سۆنگەیەوە، هەر هەنگاو و بڕیارێک لەدوای ناوەڕۆکی ئەو نووسراوی دەستەی دادوەریی هەڵبژاردنەوە دەرچووبێت، هیج بنەمایەکی نییە و بە رێکاری ئوسوڵی و یاسایی هەڵدەوەشێنرێتەوە".