رووداو دیجیتاڵ
لە شەش گوندی ناوچەیەکی باکووری کوردستان بڕیاردرا بەهۆی گرانیی نرخی کرێوە بووک عەزیەی بووکێنی لەبەر نەکات. هەروەها لە ماڵباتی هەردوولا تەنیا سێ کەس بچنە ئارایشتگە. سەرچۆپی لە ژنان قەدەخە کراوە و راشگەیێندراوە، نابێ بەناوی دیارییەوە هیچ بە ماڵی زاوا بکڕدرێ.
لە قەزای قلابانی سەر بە پارێزگای شرناخ لە باکووری کوردستان، گەورەپیاوانی شەش گوندی عەشیرەتی مەندیکان بە مەبەستی کەمکردنەوەی تێچووی پێکهێنانی ژیانی هاوژینی چەند بڕیارێکیان دەرکرد و رایانگەیاند: "پێنج مسقاڵ زێڕ زیاتر بۆ بووک نەکرێت".
لە خاڵێکی سەرنجڕاکێشی بڕیارەکاندا هاتووە، بۆ ئاهەنگی بووک گواستنەوە، جلی تایبەتی بووکێنی (عەزی سپی یان بەدلەی بووکێنی) لەبەر نەکات، ئەوەش بەو هۆکارەی بەکرێگرتنی ئەو جلەی بووک نرخی بەرزە.
لە بڕیارێکی دیکەدا بێ ئەوەی هۆکارەکەی روون بکرێتەوە راگەیێندراوە، "رێگە نادرێ ژنان سەرچۆپی بگرن".
بابەتی پەیوەندیدار
کوردستان28/04/2026
وەزارەتی ئەوقاف: جەژنی قوربانی پیرۆز 26 یان 27ی ئایار دەبێت
کوردستان28/04/2026
دوو کەس لە پارێزگای ورمێ بە رووداوی هاتووچۆ گیانیان لەدەستدا
هەروەها راگەییندراوە، پێویست نییە لە پشتی بووک و زاواوە هیچ ستاندێکی تایبەت بۆ جوانکاری دابنرێت. ئاماژە بەوەشکراوە، "لەلایەن ماڵباتی بووک و زاواوە بە هەردوولا نابێ زیاتر لە سێ کەس لەگەڵ بووک بچنە ئارایشتگا". ئەوەش بەهۆکاری بەرزیی نرخی رازاندنەوەی خانمان.
لەکاتی خوازبێنیدا نابێ شیرینی بکڕدرێ. پێش ئاهەنگی گواستنەوە بەناوی دیاریکردن و نیشانکردنەوە نابێت هیچ دیارییەک بکڕدرێ. ئەوەش دووی دیکە لە بڕیارەکانن بۆ ئاسانگاریی پێکهێنانی هاوژینی لەو ناوچەیەی باکووری کوردستان.
لە کۆبوونەوەی پیاوماقووڵانی ئەو ناوچەیەدا نرخ بۆ تیپی میوزیک دیاریکراوە کە نابێ لە هەزار و 340 دۆلار زیاتر بێت. هەروەها نابێ نرخی کامێرای وێنەگر لە 670 دۆلار زیاتر بێ.