رووداو دیجیتاڵ
سوپای پاسدارانی ئێران دەڵێ، خەریکی تەواوکردنی ئامادەکارییەکانن بۆ جێبەجێکردنی مەرج و رێکاری نوێی کارکردن لە تەنگەی هورمز؛ ئەو رێڕەوە ئاوییەی کە لە سەرەتای دەستپێکردنی جەنگ لەگەڵ ئەمریکا و ئیسرائیلەوە پەکیکەوتووە.
هێزی دەریایی سوپای پاسداران رۆژی یەکشەممە لە پۆستێکدا لە تۆڕی کۆمەڵایەتیی (ئێکس) رایگەیاند، "هێزە دەریاییەکانمان خەریکی تەواوکردنی ئامادەکارییە ئۆپەراسیۆنییەکانن بۆ جێبەجێکردنی 'پلانی راگەیێندراو'ی دەسەڵاتدارانی ئێران بۆ سیستمێکی نوێ لە کەنداوی فارس."
سوپای پاسداران هۆشداری دا کە دۆخی نێو تەنگەکە "هەرگیز ناگەڕێتەوە بۆ دۆخی پێشوو، بەتایبەتی بۆ ویلایەتە یەکگرتووەکانی ئەمریکا و ئیسرائیل."
ئەم راگەیێندراوەی سوپای پاسداران دوای ئەوە هات کە دۆناڵد ترەمپ، سەرۆکی ئەمریکا، هەڕەشەکانی بۆ لێدانی وێستگەکانی بەرهەمهێنانی کارەبا و پردەکانی ئێران نوێکردەوە، ئەگەر تاران ئەو رێڕەوە ستراتیژییەی کەشتیوانی بە رووی جیهاندا نەکاتەوە.
بابەتی پەیوەندیدار
ئابووری29/04/2026
میرشایمەر: ئێران هەرگیز سازش لەسەر تەنگەى هورمز ناکات
ئابووری29/04/2026
نرخی دۆلار 169 هەزار تمەنی تێپەڕاند
لەوەتەی جەنگ لە 28ی شوباتی رابردووەوە دەستیپێکردووە، ئێران تەنیا رێگەی بە هاتووچۆیەکی زۆر سنووردار لە نێو ئەو تەنگەیەدا داوە، ئەمەش بووەتەهۆی پەککەوتنی گواستنەوەی نزیکەی 20٪ی نەوت و گازی جیهان.
لەلایەکی دیکەوە، ئاژانسی هەواڵی فەرمیی عومان رۆژی یەکشەممە ئاماژەی بەوە کرد کە ئێران و عومان لەبارەی ئاسانکاری بۆ تێپەڕبوونی کەشتییەکان لە تەنگەی هورمز گفتوگۆیان کردووە. ئەمە لە کاتێکدایە کە لە چەند هەفتەی رابردوودا پەرلەمانتارانی ئێران پێشنیازی وەرگرتنی "باج و سەرانە"یان لەو کەشتییانە کردووە کە لەو رێڕەوە تێپەڕ دەبن.