رووداو دیجیتاڵ
نرخی زیو ئەمڕۆ سێشەممە بۆ کەمتر لە 75 دۆلار دابەزی و ئۆسەیەکی بە 74 دۆلار و 60 سەنت مامەڵەی پێوەدەکرێت.
دابەزینی ئەمڕۆی نرخی زیو لە درێژەی دابەزینەکانی رۆژی دووشەممە دێت کە بەهۆی چەقبەستنی گوتوبێژەکانی نێوان ئەمریکا و ئێران بۆ راگرتنی جەنگ و بەرزبوونەوەی نرخی نەوت و بەرزبوونەوەی هەڵاوسان، روویداوە.
تاران دەڵێت ئامادەیە تەنگەی هورمز بکاتەوە بەمەرجێک ئەمریکا سەرەتا گەمارۆی سەر بەندەرەکانی لەسەر هەڵگرێت و ئەوەش لە کاتێکدایە پێشنیازە نوێیەکەی ئێران هیچ چارەسەرێکی بۆ پرسی ئەتۆمی ئەو وڵاتە تێدا نییە.
چاوەڕوان دەکرێت، ئیدارەی ترەمپ لە چەند رۆژی داهاتوودا وەڵامی پێشنیازەکانی ئێران بداتەوە.
بازرگانانی کانزاکان بە وریاییەوە مامەڵەکانیان ئەنجام دەدەن بەو پێیەی ئەم هەفتەیە جگە لە بانکی ناوەندی ئەمریکا، بانکە ناوەندییەکانی دیکە وەک بانکی ناوەندی ئەوروپا بڕیار لەسەر سوودی بانکی دەدەن.
ئەمڕۆ بانکی ناوەندیی ژاپۆن رێژەی سوودی بانکی جێگیر کرد و گۆڕانکاری بەسەردا نەهێنا.