رووداو - تەندروستی
توێژینەوەیەک لە ژاپۆن دەریدەخات، جۆرە دەرمانێکی نوێ پەرەپێدراوە کە دەتوانێت بە خێراییەکی زۆر و بۆ ماوەیەکی درێژخایەن نیشانەکانی خەمۆکی و دڵەڕاوکێ لای مرۆڤ نەهێڵێت.
توێژینەوەکە لە زانکۆی ئۆساکا ئەنجامدراوە و تێیدا تیمێکی توێژەر بە سەرپەرشتی پڕۆفیسۆر هیتۆشی هاشیمۆتۆ دەرمانێکیان بە ناوی (PA-915) پەرەپێداوە، کە کار لەسەر وەرگرێکی دیاریکراو لە مێشکدا دەکات کە بەرپرسە لە فشارە دەروونییەکان و جیاواز لە دەرمانە باوەکان، بە خێراییەکی زۆر کاریگەرییەکانی دەردەکەون.
ئەم دەرمانە نوێیە کە لە کۆلێژی زانستە دەرمانسازییەکانی زانکۆی ئۆساکا کار لەسەر پەرەپێدانی کراوە، تایبەتمەندییەکی دەگمەنی تێدایە کە ئەویش مانەوەی کاریگەرییەکەیەتی بۆ ماوەیەکی زۆر درێژخایەن، بە جۆرێک تەنها وەرگرتنی یەک ژەم لەو دەرمانە دەبێتە هۆی ئەوەی بۆ ماوەی ٨ هەفتە یان دوو مانگی تەواو نیشانەکانی خەمۆکی و دڵەڕاوکێ لای نەخۆشەکە نەمێنێت.
بابەتی پەیوەندیدار
تەندروستی 28/04/2026
تەندروستیی جیهانی یەکەم چارەسەری مەلاریای بۆ منداڵانی ساوا پەسند کرد
تەندروستی 28/04/2026
پسپۆڕێکی منداڵان: دواخستنی کوتانی منداڵەکانتان مەترسیدارە
پڕۆفیسۆر هاشیمۆتۆ و تیمەکەی لە تاقیکردنەوەکانیاندا کاریگەریی ئەم دەرمانەیان بەراورد کردووە بە دەرمانی "کیتامین" کە بەوە ناسراوە کاریگەری خێرای هەیە، دەرکەوتووە دەرمانە نوێیەکە هاوشێوەی کیتامین کار دەکات بەڵام بەبێ ئەوەی هیچ زیانێکی لاوەکی مەترسیداری وەک ئاڵوودەبوون، تێکچوونی توانای جوڵە یان کێشەی ژیری دروست بکات.
هەروەها ئەنجامەکان ئەوەیان سەلماندووە کە دەرمانی (PA-915) تەنها نیشانەکانی خەمۆکی و دڵەڕاوکێ چارەسەر ناکات، بەڵکو کار دەکات بۆ دووبارە بەهێزکردنەوەی توانای ژیری و بیرکردنەوە و فێربوونی ئەو کەسانەی کە بەهۆی فشارە دەروونییە درێژخایەنەکانەوە تووشی کێشەی لەبیرچوونەوە و لاوازی مێشک بوون.
گرنگی ئەم هەنگاوەی زانکۆی ئۆساکا لەوەدایە کە نەخۆش چیتر پێویست ناکات وەک دەرمانە باوەکان رۆژانە چارەسەر بەکاربهێنێت و چەندین هەفتە چاوەڕێ بکات تاوەکو ئەنجامەکەی دەردەکەوێت، بەڵکو راستەوخۆ دەست بە چاکبوونەوە دەکات، ئەمەش وەک شۆڕشێکی نوێ بۆ گۆڕینی شێوازی چارەسەرکردنی نەخۆشییە دەروونییەکان لە داهاتوودا هەژمار دەکرێت.