باڵیۆزی پێشووی پاکستان لە ئێران: تەنگەی هورمز موڵکی هیچ وڵاتێک نییە

ئاسف دورانی، باڵیۆزی پێشووی پاکستان لە ئێران، لە هەڤپەیڤینێکی تایبەتدا لەگەڵ رووداو، باس لە هۆکارەکانی شکستی دانوستاندنەکان دەکات و دەڵێت، پرسی ئەتۆمی گرێکوێرەی سەرەکی بووە، چونکە واشنتن دەیەوێت تاران لە هەموو جۆرە تەکنەلۆژیایەکی ئەتۆمی بێبەش بکات، کە ئەمەش مافێکی یاسایی ئێرانە.

دورانی پێیوایە، هەرچەندە دۆناڵد ترەمپ زمانی هەڕەشە بەکاردەهێنێت، بەڵام جەنگی 40 رۆژەی رابردوو پێشانی دا هیچ لایەنێک ناتوانێت مەرجەکانی بەسەر لایەکەی دیکەدا بسەپێنێت. سەبارەت بە تەنگەی هورمز، دورانی جەخت دەکاتەوە ئەو رێڕەوە ئاوییە خاکی هیچ وڵاتێک نییە و دەبێت بە رێکارێکی نێودەوڵەتی بەڕێوەبچێت بۆ ئەوەی بازرگانیی جیهانی پەکینەکەوێت.

باڵیۆزی پێشووی پاکستان، کە وڵاتەکەی نێوەندگیرێکی سەرەکییە، هۆشداری دەدات بەهۆی هێرشەکانی رابردوو لە کاتی دانوستاندنەکاندا، متمانەیەکی ئەوتۆ لە نێوان هەردوولادا نەماوە و هەر ئەمەش وایکردووە ئاگربەستەکە بە لەرزۆکی بمێنێتەوە.

ئاسف دورانی: وەکو جەی دی ڤانس، جێگری سەرۆکی ئەمریکا روونی کردەوە، زۆربەی بابەتەکە پەیوەندی بە کێشەی ئەتۆمییەوە هەبوو، بەڵام ئەمەش جێگەی سەرسوڕمانە، چونکە پێشتر ئێران رایگەیاندبوو نایەوێت چەکی ئەتۆمی دروست بکات، ئەوان لەژێر چوارچێوەی رێککەوتنی ئەتۆمی رایانگەیاندبوو سنووری پیتاندنی یۆرانیۆمیان 3.67٪ بێت. بەپێی پەیماننامەی قەدەخەکردنی بڵاوکردنەوەی چەکی ئەتۆمی، مافی ئێرانە دەستی بە تەکنەلۆژیای ئەتۆمی بگات، بەڵام وا دیارە ئەمریکا دەیەوێت هەموو جۆرە تەکنەلۆژیایەکی ئەتۆمی لە ئێران قەدەخە بکات، پێموانییە ئەمە رێگەیەکی دروست بێت و پێویستە ئەم بابەتە چارەسەر بکرێت. هەرچەندە ئەم خولە ئەنجامێکی وەهای نەبوو کە چاوەڕوان دەکران، بەڵام هەردوو وڵات، مەبەستم ئەمریکا و ئێرانە، دەرفەتیان بە دیپلۆماسی داوە، کاتێک دیپلۆماتەکان دادەنیشن، رێگەیەک بۆ دەرچوون دەدۆزنەوە، هیواخوازم لە گەڕەکانی داهاتوودا ئەو گرفتانە چارەسەر بکەن کە لە گفتوگۆکانی ئیسلامئاباد رووبەڕوویان بووەوە.

ئاسف دورانی: بەڵێ، ئەگەری گفتوگۆ هەیە، چونکە بەبێ ئەوە دەگەنە بنبەست، واتە رێگەیەکی داخراو کە ناتوانن بگەنە هیچ ، پێم وانییە ئەمریکا لە پێگەیەکدا بێت مەرجەکانی خۆی بەسەر ئێراندا بسەپێنێت، وەکو لەم جەنگە 40 رۆژەیەدا بینیمان، هەروەها ئێرانیش نایەوێت بچێتە ناو جەنگەوە، بۆیە گرنگە دابنیشن و سەیری خاڵە جیاوازەکان بکەن و هەوڵی چارەسەرکردنیان بدەن.

ئاسف دورانی: پێموایە دەبێت پاکستان بەردەوام بێت لە هەوڵەکانی، وەکو چۆن لە راگرتنی جەنگدا کردی، تەنیا دوو یان سێ کاژێر مابوو بۆ ئەو مۆڵەتەی سەرۆک ترەمپ دابووی، بەڵام لۆژیک زاڵ بوو و جەنگەکە راگیرا، هیواخوازم وەکو هەنگاوێک بۆ متمانەی هەردوولا، ئاگربەستەکە درێژبکرێتەوە، لەم نێوەندەدا هەردوو لایەن دەست بکەنەوە بە گفتوگۆ و ئەو کێشانە چارەسەر بکەن لە گەڕی یەکەمدا لە ئیسلامئاباد چارەسەر نەکران.

ئاسف دورانی: لەم بارودۆخەدا، کاتێک متمانە کەم بێت، بێگومان ئاگربەست بە لەرزۆکی دەمێنێتەوە بۆ نموونە، ئێران مافی خۆیەتی متمانەی بە ئەمریکا نەبێت، چونکە دوو جار کاتێک گفتوگۆکانی ئەتۆمی لە قۆناخی کۆتاییدا بوون و ئاماژەی ئەرێنی هەبوون، ئیسرائیل ساڵی رابردوو هێرشیکردە سەر ئێران لە جەنگێکی 12 رۆژەدا و دواتر ئەمریکاش بەدوایدا، دووبارە لە 28ـی شوباتدا، سەرەتا ئیسرائیل هێرشیکرد و پاشان ئەمریکا، کەواتە لەرزۆکی ئاگربەستەکە هەر دەمێنێت چونکە هەردوولا نەیانتوانیوە ناکۆکییەکانیان چارەسەر بکەن.