رووداو دیجیتاڵ
کۆمپانیای کۆڕەک تیلیکۆم رایدەگەیێنێت، دادگەی بەرایی رەسافە لە بەغدا بڕیارێکی دەستەی راگەیاندن و گەیاندنی عێراقی (CMC) هەڵوەشاندەوە، کە بە شێوەیەکی تاکلایەنە گرێبەستی یەکلاکردنەوەی دارایی لەگەڵ کۆمپانیاکە هەڵپەساردبوو؛ دادگە بڕیاری داوە بە کارکردنەوەی دەستبەجێ بە گرێبەستەکە.
ئەمڕۆ دووشەممە، 28ـی ئەیلوولی 2026، کۆمپانیای کۆڕەک تیلیکۆم لە راگەیێندراوێکدا بە ناونیشانی "دادپەروەری سەردەکەوێت رایگەیاند: "دوای ئەوەی لە 2ـی حوزەیرانی ئەمساڵدا دەستەی گەیاندنی عێراق بە تاکلایەنە بڕیاری هەڵوەشاندنەوەی گرێبەستی یەکلاییکردنەوەی دارایی (تەسویەی مالی) نێوانیانی دا، کۆمپانیاکە پەنای بردە بەر دادگە و ئەمڕۆش دادگەی بەرایی رەسافە بە فەرمی بڕیاری هەڵوەشاندنەوەی بڕیارەکەی دەستەکەی دەرکرد."
بەپێی بڕیارەکەی دادگە، پێویستە دەستبەجێ کارکردن بە گرێبەستی یەکلاکردنەوەی دارایی نێوان هەردوولا، کە لە 23ـی ئەیلوولی 2025 واژۆ کرابوو، دەستپێبکاتەوە.
کۆڕەک تیلیکۆم وێڕای پێشوازیکردن لە بڕیارەکە، رایدەگەیێنێت: "لەسەر بنەمای باوەڕبوونمان بە سەروەریی یاسا و دادگە پەنامان بۆ یاسا برد کە بە تەنیا رێگەی پاراستنی مافەکانی دەزانین." هاوکات سوپاسی بەشداربووانی دەکات "بۆ خۆڕاگرییان لە بەرامبەر ئەو گوشارانەی لە ماوەی رابردوودا دروستکرابوون" و دڵنیایی پێدان کە بەرگری لە مافەکانیان دەکات.
کۆمپانیاکە داواش لە دەستەی گەیاندنی عێراق دەکات: "لاپەڕەیەکی نوێ دوور لە دروستکردنی کۆسپ و ناکۆکی بکرێتەوە، تاوەکو پێکەوە لەسەر بنەمای یاسا خزمەتی بەشداربووان و کەرتی پەیوەندییەکان بکەن، دوور لە هەر رێوشوێنێکی ستەمکارانە کە لە بەرژەوەندیی گشتیدا نییە."
ئەم سەرکەوتنە یاساییەی کۆڕەک لە کاتێکدایە، پێشتر دەستەی گەیاندنی عێراق هەڕەشەی کردبوو کە لە کۆتایی ئەم مانگەدا سەرجەم بەدالەکانی کۆڕەک بکوژێنێتەوە و داوای لە هاوبەشانی کردبوو ژمارەی کۆمپانیاکانی دیکەی گەیاندن وەکو جێگرەوەی کۆرەک بۆ ئەکاونتەکانیان زیاد بکەن.
لەو بارەیەوە پێشتر ئانۆ جەوهەر، وەزیری گواستنەوە و گەیاندنی هەرێمی کوردستان لە لێدوانێکدا بۆ رووداو گوتبووی: "دەستەی گەیاندنی عێراق ناتوانێت لە کوردستان کۆڕەک بکوژێنێتەوە، کۆڕەک کۆمپانیایەکی کوردستانییە و بە بڕیاری حکومەتی هەرێمی کوردستان کار دەکات، کەسیش ناتوانێت لە کوردستان کۆمپانیایەک دابخات بەبێ گەڕانەوە بۆ حکومەتەکەمان؛ چونکە سیستمی عێراق فیدراڵییە نەک دیکتاتۆری."
