رووداو دیجیتاڵ
رۆژى یەکشەممە، چەند هاونیشتمانییەک لە باخى گشتیى سلێمانى سکاڵایان هێنایە بەردەم مایکى کەناڵەکانى راگەیاندن، گوتیان گوایە کەسێک قۆڵى بڕیون و بەناوى قەرزەوە مامەڵەى لەگەڵ کردوون، بەڵام دەستى دەستییان پێدەکات و پارەکەیان ناداتەوە.
هەڵۆ شامار، فرۆشیارێکە و گوتی، "ئەو کەسە پەیوەندى پێوەکردم، گوتى خێزانم لە خەجێ خان کولێرە دەکات و 03:00ى شەو دێتەوە، سەیارەکەم بدەرێ و پارەیەکی کەمی وەک پێشەکی داپێم، چووین سەیارەکەى بدەمێ و دوو وەرەقە پێشەکى بدات، لەوکاتەدا تەلەفۆنى بۆ هات و گوتى نەخۆشمان هەیە ئێستا دێمەوە، ئیتر نەهاتەوە."
زۆرینەى ئەو پێداویستییانەى مامەڵەى پێوەکراوە، یان کۆن و بەکارهاتوو یان ئۆتۆمبێلى بێ سەرەتا و تۆمارنەکرابوون، کارەکانیش لە رێگەى فەیسبووک و بە بێ شایەت و نووسراوێکى فەرمى کراون.
سیروان قادر، فرۆشیارێکی دیکەیە و دەڵێت، "هات بۆ چەمچەماڵ گوتى مناڵێکى نەخۆشم هەیە، دەبێت بەڕێى نەخۆشخانەوە بم با تەکلیف لەکەس نەکەم. ئۆتۆمبێلەکەمم پێدا بایى 20 وەرەقە بوو چوار وەرەقەی دا و ئیتر ئەوى دیکەی نەهێنایەوە."
تائێستا سکاڵا لاى پۆلیس نەکراوە، بەوپێیەى وەک دەڵێن، ئەگەر کەسەکە بگیرێت وەرگرتنەوەى پارەکەیان ئەوەندەى دیکە دوادەکەوێت.
نەوشیروان جەعفەر، فرۆشیارێکە و گوتی، "تەلەفزیۆنێکم پێفرۆشت پێش جەژنن گوتى منداڵەکەم نەخۆشە و بەبێ تەلەفزیۆن ئیدارە ناکات، بایی 120 هەزار بوو، هەر بە بەیانى و دوو بەیانی بوو بە مانگێک و پارەکەى نەهێنا."
بەگوتەى ئەو چەند کەسە، کۆى ئەو پارانەى بەناوى قەرز و کڕین، لەو مامەڵانەدایە نزیکە لە 30 هەزار دۆلارە [3 دەفتەر دۆلار.]