هۆکاری کوژرانی هاونیشتمانییەک لە قوشتەپە؛ 'پێشتر بە ئۆتۆمبێل لە منداڵی بکوژەکەی داوە'

ئەمڕۆ سێشەممە، بەرپرسێک لە قەزای قوشتەپە بە تۆڕی میدیایی رووداوی گوت: "ئەو کەسەی ئەمڕۆ کوژرا ناوی ئاوارە ناسیحە؛ دوو ساڵ لەمەوبەر بە ئۆتۆمبێل لە کوڕی تۆمەتباری کوشتنەکەی ئەمڕۆی دابوو بەهۆیەوە گیانی لەدەستدابوو".

دوای ئەوەی دوو ساڵ لەمەوبەر ئاوارە ناسیح بە ئۆتۆمبێل لە منداڵێکی داوە و دوای گەیاندنی بە نەخۆشخانە گیانی لەدەستداوە، دواتر ئاشتەواییان کردووە و ئاوارە دوای چەند مانگێک لە زیندان ئازاد کراوە.

بەگوێرەی بەرپرسانی قوشتەپە بۆ رووداو، ئەمڕۆ باوکی منداڵەکە چووە هەر لە قوشتەپەدا تۆمەتباری گیانلەدەستدانی کوڕەکەی بە گولـلە کوشتووە.

رووداو زانیویەتی، دوای رووداوەکە، تۆمەتباری کوشتنەکە خۆی رادەستی پۆلیس کردووە.