رووداو دیجیتاڵ
لەگەڵ بەردەوامبوونی شەڕێکی دژوار لە کوردستان، کەچی راگەیاندنی جیهانی تەنیا ناکۆکییەکان بۆ بەرژەوەندی خۆیان بەکاردەهێنن. ئەمە هۆکارێکە بۆ ئەوەی کاتێک وەکو رۆژنامەنووس سەردانی کوردستان دەکەیت بە باوەشێکی گەرمەوە بەخێرهاتنت بکەن. بەدیوەکەی دیکەدا کورد وەکو مرۆڤی زۆر میهرەبان و کراوە تەماشا دەکرێن. دەست بەڕووی میوانەوە نانێن، ئەوە لەکاتێکدا بوو کە ئێمە سەرکردە و پێشمەرگەکانمان لە بەرەکانی شەڕدا بەسەر دەکردنەوە.
هەموویان بە ریز دەوەستان بۆ ئەوەی وێنەیان بگرم، تاوەکو بتوانم باسی نەهامەتییەکانی ژیان و خەباتەکەیان بگێڕمەوە، بۆ ئەوەی وەکو هاووڵاتی پلە دوو مامەڵەیان لەگەڵ نەکرێت.
"خەڵکی عەرەب دووژمنی ئێمە نین، بەڵکو ئەوە رژێمی بەغدایە کە دووژمنمانە. ئێمە دەبێت رژێمی بەعس بڕووخێنین، پاشان شانبەشانی عەرەبەکان وڵاتێکی دیموکراتی لە عێراق کە لەلایەن رژێمێکەوە کە خەڵک هەڵیبژاردبێت بنیات بنێین. رژێمی بەعس هیچ کاتێک نەیوێراوە هەڵبژاردن بکات."
ماوەی ساڵێکە لەنێوان پێشمەرگەکانی کورد و رژێمی عێراق لە باکووری عێراق دا (باشووری کوردستان) شەڕێکی قورس لە ئارادایە، عێراق نزیکەی دوو لەسەر سێی سوپاکەی بەکارهێناوە واتە زیاتر لە 60 هەزار سەرباز بەرانبەر نزیکەی 50 هەزار پێشمەرگە.
سوپای عێراق لەلایەن سۆڤیەتەوە بە چەک و چاودێری سەربازییەوە پشتیوانی دەکرێت. هەرچی کوردە لەلایەن ئێرانەوە کە رکابەری وڵاتی دراوسێی عێراقە هاوکاری دەکرێن. ئەو شەڕەی لە چیاکانی کورد دەکرێت دەتوانین بڵێین تووندترین شەڕە کە ئێستا لە جیهان دا بەردەوامە. عێراق بە هەموو هێزی خۆیەوە، بە بۆم و تۆپی قورس و جبەخانەی خۆیەوە بەردەوام سەنگەرەکانی پێشمەرگە دەکوتێت. هەر لەسەرەتای شەڕەکەوە ناپاڵم و بۆمبی سوتێنەریان بەکارهێناوە.
لەم دواییانەدا کوردیش چەکی مۆدێرنی وەکو رۆکێتی دەبابەشکێن و تۆپی مامناوەندیان بەدەست خستووە.
کەواتە شەڕ لەسەر چی دەکرێت؟
شەڕەکە مێژوویەکی درێژی هەیە. هەر لە ساڵانی سییەکانەوە کورد دەستیان بە راپەڕین کردووە، داوای ئۆتۆنۆمی دەکەن. ئیتر لەوکاتەوە چەندین جار رووبەڕووی سوپای عێراق بوونەتەوە و داوای مافە نەتەوەییەکانی خۆیان دەکەن. ژمارەی کورد لە رۆژهەڵاتی نێوەڕاست دا دەگاتە نزیکەی 14 ملیۆن کەس، ئەوان بەسەر وڵاتەکانی تورکیا، سووریا، ئێران و عێراق دا دابەش کراون. ژمارەی کورد لە عێراق دا نزیکە دوو ملیۆن و 500 هەزار کەس دەبن.
ئەوان خاوەنی زمان، کولتوور و مێژویەکی هاوبەشن. پێشتر کوردستان بە پلەی یەکەم کۆمەڵگەیەی خێڵەکی و دەرەبەگی بووە، بەڵام بەهۆی پەرەسەندنی بەرهەمی پیشەسازی نەوت، ناوچە کوردییە بە کانزا دەوڵەمەندەکان،تاوەکو دێت سەرمایەداری تەنگ بە پەیوەندییە دەربەگییەکان هەڵدەچنێت و لەبەریەک هەڵیاندەوەشێنێتەوە. خەباتی نەتەوەیی بووەتە هۆی ئەوەی خێڵە رکابەرەکان یەکبگرن. کورد لە عێراق لەڕووی سیاسی و لەڕووی فەرهەنگییەوە، ئازادییەکی بەرفراوانیان بەدەستهێنا، لەو پێناوەشدا خەباتێکی قورسیان کردووە.
هۆکاری ئەوەی کە شەڕی ئەم دواییە دەستی پێکردەوە، مێژوویەکی پێچەڵی هەیە. بە کورتی دەتوانین بڵێین رژێمی عێراق خوازیاری ئەوە نەبوو هەموو خاڵەکانی رێککەوتننامەی ئاشتی ساڵی 1970 جێبەجێ بکات. چەندین جاریش هەوڵی ئەوەیدا رابەری سیاسی کورد لەنێو ببات. ئەمڕۆ خەباتی کورد لەلایەن پارتی دیموکراتی کوردستان و سەرۆکەکەی مستەفا بارزانی یەوە رابەرایەتی دەکرێت.
پارتی خۆی وا نیشاندەدات کە پارتێکی سۆسیال دیموکراتە، لە پرۆگرامەکەیدا دژایەتی خۆی بۆ دەرباگایەتی و ئیمپریالیزم راگەیاندووە.
هۆکاری ئەوەی کە کورد پشتیوانی (رژێمی چەوسێنەری شا)یان قبوڵکردووە دەبەستنەوە بەوەی کە بەبێ ئەو پشتیوانییە "ناتوانن بوونی خۆیان بپارێزن."
ئەوان دەپرسن ئایا ئێمە دەبێت مرۆڤی ئایدیالیست بین و دەست بەڕووی هاوکارییەکانەوە بنێین و بەوشێوەیە بەرەو نەمان بچین؟
