رووداو دیجیتاڵ
سیاسەتمەدارێکی گەنجی کورد لە هەڵبژاردنە خۆجێییەکانی ئەڵمانیا سەرکەوتنی تۆمارکرد و بووە سەرۆکشارەوانیی شاری رۆزێنهایم. ئەو گەنجە توانی دوای 65 ساڵ، پۆستی سەرۆکشارەوانی لە کریستیانە سۆسیالەکان بستێنێتەوە و بیداتەوە بە پارتی سۆسیال دیموکرات (SPD).
ئەبوزەر ئەردۆغان، تەمەن 33 ساڵ، کە بەربژێری پارتی سۆسیال دیموکرات بوو، لە گەڕی دووەمی هەڵبژاردنە خۆجێییەکانی هەرێمی بەیارنی باشووری ئەڵمانیا، کە لە 22ی ئاداری 2026 بەڕێوەچوو، توانی 53.4٪ی دەنگەکان بەدەستبهێنێت و لە ئەندریاس مێرتزی رکابەری بباتەوە.
ئەبوزەر ئەردۆغان کوڕی خێزانێکی کوردی عەلەوییە کە لە باکووری کوردستانەوە کۆچیان بۆ ئەڵمانیا کردووە. بڕیارە لە مانگی ئایاری ئەمساڵدا بە فەرمی پۆستی سەرۆکشارەوانیی شاری رۆزێنهایم وەربگرێت، کە شارێکە زیاتر لە 65 هەزار کەسی تێدا دەژیت.
ئەبوزەر لە ساڵی 1993 لە رۆزێنهایم لەدایکبووە.
بابەتی پەیوەندیدار
کوردستان28/04/2026
وەزارەتی ئەوقاف: جەژنی قوربانی پیرۆز 26 یان 27ی ئایار دەبێت
کوردستان28/04/2026
دوو کەس لە پارێزگای ورمێ بە رووداوی هاتووچۆ گیانیان لەدەستدا
دەرچووی کۆلێژی یاسایە لە زانکۆی "لودڤیگ-ماکسیمیلیان" لە میونشن و پێش ئەوەی بچێتە نێو کایەی سیاسییەوە، وەک پارێزەری یاسای ئابووری کاری کردووە.
ژیانی سیاسیی ئەو گەنجە کوردە لە ساڵی 2009وە لە نێو پارتی سۆسیال دیموکرات دەستیپێکردووە و دواتر بووەتە جێگری سەرۆکی فراکسیۆنی پارتەکەی لە ئەنجوومەنی شاری رۆزێنهایم.
سەرۆکشارەوانییە نوێیەکەی رۆزێنهایم رایگەیاندووە، کار لەسەر سیاسەتێکی ئابووریی دووربین و دابینکردنی خانووی هەرزان بۆ هاووڵاتییان دەکات.
ئەبوزەر ئەردۆغان جەخت لەوە دەکاتەوە کە دەیەوێت شارەکەی وەک ناوەندێکی مرۆڤدۆستانە بمێنێتەوە و دەڵێت: "دەمەوێت رۆزێنهایم وەک شارێک بمێنێتەوە کە تێیدا فرەڕەنگی و جیاوازییەکان وەک هێزێک سەیر دەکرێن؛ شارێکی کراوە، سینگفراوان و مرۆڤدۆست بێت."
سەرکەوتنی ئەم گەنجە کوردە لە میدیاکانی ئەڵمانیادا دەنگدانەوەی زۆری هەبووە، بەتایبەت کە توانیویەتی قەڵایەکی بەهێزی پارتی کریستیانە سۆسیالەکان (CSU) بگرێت، کە بۆ ماوەی زیاتر لە نیو سەدە بوو رکابەریان نەبوو لەو شارەدا.