رووداو دیجیتاڵ
درەنگانی شەوی رابردوو لە سنووری قەزای خەلیفان، بە دوو درۆن هێرش کرایە سەر کارگەیەکی بەرهەمهێنانی خەڵووز. خاوەنی کارگەکە دەڵێت، سەرجەم کارگەکەیان بەسەریەکدا رووخاوە و زیانێکی زۆریان پێگەیشتووە.
هێرشەکە لە گوندی رماوێژ لە دۆڵی مەلەکانی قەزای خەلیفانی سەر بە ئیدارەی سەربەخۆی سۆران بووە.
بورهان بلەیی، خاوەنی کارگەکە بە تۆڕی میدیایی رووداوی راگەیاند، درەنگانی دوێنێ شەو کارگەکەیان بە دوو درۆن کراوەتە ئامانج و بەتەواوی وێران بووە.
لەبارەی قەبارەی زیانەکانەوە، بورهان بلەیی گوتی: "هەموو کارگەکەمان بەسەریەکدا رووخاوە و زیانەکانمان بە زیاتر لە 60 هەزار دۆلار دەخەمڵێندرێت."
لە قەزای خەلیفان کارگەیەکی بەرهەمهێنانی خەڵووز بە دوو درۆن کرایە ئامانج و خاوەنەکەی باسی زیانەکانی دەکات pic.twitter.com/QxGAN6nCdj
— Rudaw (@Rudawkurdish) April 1, 2026
تاوەکو ئێستا هیچ لایەنێک بەرپرسیارێتیی خۆی لە هێرشەکە رانەگەیاندووە و زیانی گیانی لێنەکەوتووەتەوە.