رووداو دیجیتاڵ
وەک نیشانەی بەهێزی دۆستایەتی لەگەڵ کوردستان و شاری زاخۆ، لە شاری مۆڕهێد لە ویلایەتی مێنسۆتا، پارکێک بەناوی کوردستان دەکرێت.
رۆژی چوارشەممە، 1ـی نیسانی 2026، بە ئامادەبوونی بەرپرسانی شاری مۆڕهێد و ئەندامانی کۆنگرێسی ویلایەتی مێنسۆتا و رەوەندی کوردی، کۆنفرانسێکی تایبەت بە دۆستایەتی کوردستان و شاری مۆڕهێد بەڕێوەچوو.
لە کۆنفرانسەکەدا، شێڵی کارڵسن، سەرۆکشارەوانی مۆڕهێد لە گوتارێکیدا رایگەیاند بۆ رێزگرتن لە دۆستایەتی نێوان شاری مۆڕهێد و زاخۆ، یەکێک لە پارکەکانی شارەکە بەناوی کوردستان دەکەن.
هاوکات، جیهان بریفکی، کوردێکی دانیشتووی ئەو شارەیە و لە کۆنفرانسەکەدا بەشداربوو، بە رووداوی راگەیاند، ئامانج لە کۆنفرانسەکە بەهێزکردنی پەیوەندییەکانی نێوان کوردستان و شاری مۆڕهێد و ویلایەتی مێنسۆتایە.
بابەتی پەیوەندیدار
کوردستان28/04/2026
وەزارەتی ئەوقاف: جەژنی قوربانی پیرۆز 26 یان 27ی ئایار دەبێت
کوردستان28/04/2026
دوو کەس لە پارێزگای ورمێ بە رووداوی هاتووچۆ گیانیان لەدەستدا
جیهان یەکێکە لەو کەسانەی هاوکاربووە لە رێکخستنی دۆستایەتی نێوان مۆڕهێد و زاخۆ و لە کۆنفرانسەکەشدا گوتارێکی پێشکێش کرد باسی لە گرنگی دۆستایەتی کورد و شاری مۆڕهێد کرد.
جیهان ئاماژەی بەوەشکرد، لە چەند مانگی رابردوودا، لەگەڵ شاندێکی شاری مۆڕهێد سەردانی کوردستانیان کردووەو ئەم سەردانەش لەدوای ئەوەهات کە شارەکانی زاخۆ و مۆڕهێد لە تەممووزی ساڵی رابردوو، لە ویلایەتی مێنسۆتا یاداشتێکی دۆستایەتیان واژۆکرد و گۆهدار شێخۆ، سەرپەرشتیاری ئیدارەی سەربەخۆی زاخۆ لە رێورەسمەکەدا ئامادەبوو.
شاری مۆڕهێد دەکەوێتە ویلایەتی مێنسۆتا لە ئەمریکا، ژمارەی دانیشتوانی نزیکەی 46 هەزار کەس دەبێت و %8ی دانیشتوانی شارەکە کوردن.