رووداو دیجیتاڵ
گوتەبێژی دەستەی ژینگەی هەرێمی کوردستان رایگەیاند، تاوەکو ئەمڕۆ جەنگ لە ناوچەکە نەبووەتە هۆکاری پیسبوونی هەوا. ئاماژە بە مەترسییەکانی بەردەوامیی جەنگ لە داهاتووی کوردستان دەکات و دەڵێ، ئاو، خاک و هەوا پیس دەکات.
د. سەنعان عەبدوڵڵا، ئەمڕۆ سێشەممە بە تۆڕی میدیایی رووداوی گوت: "وێڕای بەردەوامیی جەنگ، تاوەکو ئەمڕۆ هەوای هەرێمی کوردستان ئاساییە و مەترسیی لەسەر نییە".
گوتەبێژی دەستەی ژینگە، بەردەوامبوونی جەنگەکە بە مەترسی بۆ ژینگەی هەرێمی کوردستان دەزانێت و دەڵێت: "ئەگەر جەنگەکە درێژە بکێشێ، کاریگەریی زۆر خراپی دەبێت لەسەر ئاو، خاک و هەوای هەرێمی کوردستان".
لە 28ـی شوباتەوە جەنگی ئەمریکا و ئیسرائیل لەگەڵ ئێران دەستیپێکردووە و بەردەوامە، لەو نێوەندەدا تاوەکو ئەمڕۆ لەلایەن ئێران و گرووپە چەکدارە عێراقییەکانی نزیک ئێرانەوە بە نزیکەی 700 درۆن و مووشەک هەرێمی کوردستان بۆردوومان کراوە.
بابەتی پەیوەندیدار
کوردستان28/04/2026
وەزارەتی ئەوقاف: جەژنی قوربانی پیرۆز 26 یان 27ی ئایار دەبێت
کوردستان28/04/2026
دوو کەس لە پارێزگای ورمێ بە رووداوی هاتووچۆ گیانیان لەدەستدا
د. سەنعان عەبدوڵڵا گوتی: "هەر درۆن و مووشەکێک لە ئاسمانی هەرێمی کوردستان بێت دووکەڵی هەیە و کاریگەری خراپی بۆ هەوا هەیە، دوای تەقینەوەشی دیسانەوە هەوا پیس دەکات".
گوتەبێژی دەستەی ژینگە گوتی: "یەکێک لە مەترسییەکانی جەنگ و بەردەوامبوونی ئەوەیە، پاشماوەکانی جەنگ وەکو پارچەکانی مووشەک و درۆن تێکەڵی خاک و سەرچاوەکانی ئاو ببن، ئەوانە تاوەکو ئێستا زیانەکانیان نازاندرێت، بەڵام دوای بەردەوامبوون و توێژینەوەکردن لەسەریان مەترسییەکانیان دەردەکەون".
بە گوتەی د. سەنعان عەبدوڵڵا، یەکێکی دیکە لە مەترسییەکانی جەنگ کەوتنەخوارەوەی درۆن و پاشماوەکانی جەنگە لە ناوچە سرووشتییەکان و مەترسیی دروستکردنی ئاگر و لەنێوبردنی هەموو جۆرە زیندەوەرەکانی نێو سرووشتە.
گوتەبێژی دەستەی ژینگەی هەرێمی کوردستان گوتی: "لەکاتێکدا ئێمە سەرقاڵی رێکارەکانی رووبەڕووبوونەوەی گۆڕانی کەشوهەوا بووین، ئەم جەنگە هەمووی راگرت و خەریکە رەگەزەکانی ژینگە و هەمووی تێک دەدات".