رووداو دیجیتاڵ
دەستەی ژینگەی هەرێمی کوردستان رایدەگەیێنێت، نیوەی موەلیدەکان کوژێندراونەتەوە و بەهۆیەوە رۆژانە 690 هەزار تۆن گازی دوانەئۆکسیدی کاربۆن لە هەوا کەمدەبێتەوە. ئاماژە بەوەش دەکات، رێژەی سەوزایی لە 15%ـەوە بۆ نزیکەی 20%بەرزبووەتەوە.
رۆژی پێنجشەممە، دەستەی ژینگەی هەرێمی کوردستان لە راگەیێندراوێکدا رایگەیاند، لە 7000 موەلیدە بەهۆی پڕۆژەی رووناکییەوە زیاتر لە نیوەیان کوژێندراونەتەوە.
سەنعان عەبدوڵڵا، گوتەبێژی دەستەی ژینگەی هەرێمی کوردستان، ئەمڕۆ پێنجشەممە بە تۆڕی میدیایی رووداوی گوت: "پڕۆژەکانی حکومەت کاریگەری زۆر باشیان هەبووە بۆ باشترکردنی ژینگە و لە داهاتوودا باشتریش دەبن".
لەبارەی هەوا و ژینگەی شارەکانی هەرێمی کوردستانەوە گوتەبێژی دەستەی ژینگە دەڵێت: "بەگشتی بۆ تەندروستی گشتیی بەرەو باشتربوون چووە، بەڵام ناتوانین بڵێین 100% خاوێنە و هیچ مەترسی نییە، چونکە ئەوە توێژینەوەی تایبەتی دەوێ".
بەگوێرەی راگەیێندراوەکە، "نزیکەی %75ـی هەرێمی کوردستان خاوەنی کارەبای 24 کاژێرییە و بەهۆی پڕۆژی رووناکییەوە 3689 موەلیدە کوژێندراونەتەوە، ئەمەش واتە کەمبوونەوەی 690 تۆن گازی دوانەئۆکسیدی کاربۆن لە هەوا بەشێوەی رۆژانە".
وەکو دەستەی ژینگە دەڵێت: "%84ـی کارەبا بە گازی سرووشتی و کارۆئاوی بەرهەم دەهێندرێت، هەروەها وێستگەی تایبەت بە بەرهەمهێنانی کارەبا لە گازی بەفیڕۆچووی کێڵگە نەوتییەکان دامەزرێنراون کە رێگری لە چوونی گازی ژەهراوی بۆ ناو هەوا دەکات. هەروەها سێ وێستگەی دیکە تایبەت بە بەرهەمهێنانی کارەبا بە وزەی خۆر لە هەر سێ پارێزگای هەولێر، سلێمانی و دهۆک دانراون".
دەستەی ژینگە رایگەیاندووە: "چوار وێستگەی نوێی پێوانەكردنی كوالێتی هەوا لە هەولێر دادەنرێن، سیستمەکە تایبەتە بە ئاگادارکردنەوەی پێشوەختە لە بڵاوبوونەوەی گاز و تیشکە زیانبەخشەکان لە هەوادا، هەر تیشکێک لە هەوادا بڵاو بووبێتەوە، پێشوەختە ئەم سیستەمە لە پیسبوونی هەوا ئاگاداری دەدات".
ساڵانە بۆ پاراستنی دارستەکانەکان لە وەرزی هاویندا ئاگربڕ دروست دەکرێت. دەستەی ژینگە دەڵێت: "حکومەتی هەرێمی کوردستان بە ئامانجی پاراستن و کەمکردنەوەی مەترسییەکانی ئاگرکەوتنەوە لەنێوان دارستانەکان، رەز، باخ و کێڵگەکان لە مەترسیی سووتان و ئاگرکەوتنەوە، 34 ملیۆن مەتر ئاگربڕی لە رێگەی ئامێرەكانەوە لە تەواوی هەرێمی کوردستان داناوە".
بەگوێرەی دەستەی ژینگەی هەرێمی کوردستان بێت، نزیکەی 150 هەزار مین و تەقەمەنی و پاشماوەی جەنگی لە هەرێمی کوردستان پووچەڵ کراونەتەوە.
کارگەکانی ریسایکلین بۆ بەکارهێنانەوەی کەرەستەی کۆن
دەستەی ژینگە ئاماژەی بە کارگەی ریسایکلینی قیر کردووە کە کارگەیەکی ژینگەیی و ئابوورییە و قیری کۆنی هەڵکەنراوی شەقامەکان دووبارە بەکاردەهێنێتەوە؛ "ریسایکلینی قیر دەبێتە هۆی کەمکردنەوەی بەکارهێنانی مادە نەوتییەکان، کەمکردنەوەی پاشماوەی قیری کۆن، ئەم کارگەیە کە ئێستا کار دەکات، لە توانایدایە رۆژانە دوو هەزار تۆن لە قیری کۆنی شەقامەکان ریسایکل بکاتەوە".
بابەتی پەیوەندیدار
کوردستان28/04/2026
وەزارەتی ئەوقاف: جەژنی قوربانی پیرۆز 26 یان 27ی ئایار دەبێت
کوردستان28/04/2026
دوو کەس لە پارێزگای ورمێ بە رووداوی هاتووچۆ گیانیان لەدەستدا
بەگوێرەی دەستەی ژینگە، لە هەولێر کارگەی ریسایکلینی پلاستیک هەیە و بوتڵ و پلاستیکەکان کۆ دەکاتەوە و دەیانگۆڕێت بۆ مادەی نوێ. هەروەها "چەندین" کارگەی تایبەت هەن بۆ دووبارە بەکارهێنانەوەی کاخەز و کارتۆنی کۆن و دروستکردنی بەرهەمی نوێ.
رێژەی سەوزایی لە هەرێمی کوردستان
دەستەی ژینگەی هەرێمی کوردستان بە بایەخەوە لە هەوڵەکانی حکومەتی روانیوە بۆ زیادکردنی رێژەی سەوزایی و رایگەیاندووە، "بەهۆی پرۆژە ژینگەییەکانەوە، رێژەی سەوزایی لە 15%ـەوە بۆ نزیکەی 20%بەرز بووتەوە، هاوکات حکومەتی هەرێمی کوردستان سەرجەم کارگە و پڕۆژەکانی ناچار کردووە، کە دەبێت 25%ـی رووبەری پڕۆژەکانیان بکەنە سەوزایی".
لە کابینەی نۆیەمدا 17 هەزار و 453 پڕۆژە مۆڵەتی ژینگەییان وەرگرتووە و 25%ـی رووبەرەکەیان بۆ سەوزایی تەرخان کردووە. دەستەی ژینگە دەڵێت: "ئەو پڕۆژانەی بەر لە کابینەی نۆیەم مۆڵەتیان وەرگرتووە و شوێنی سەوزکردنیان نییە، رێکاری یاساییان، لەبڕی سەوزکردنیان بەرامبەر گیراوەتە بەر و 3 ملیۆن و 45 هەزار مەتر دووجا، لە شوێنی دیکەی دەرەوەی پڕۆژەکانیان پێ سەوز کراوە".
لە راگەیێندراوەکەدا باس لە پڕۆژەی پشتێنەی سەوزایی هەولێر کراوە و راگەیێندراوە، بە تەواوبوونی "ژینگەی هەولێر بەتەواوەتی دەگۆڕێت، کە بەشێوەیەکی بازنەیی بەدەوری هەولێر دروست دەکرێت".
"کار لەسەر دروستکردنی 18 بەنداو دەکرێ"
لە بەشی کۆتایی راگەیێندراوەکەدا هاتووە، "لە کابینەی نۆیەمدا 9 بەنداو دروست کراون کە بەتێکڕا دەتوانن زیاتر لە 252.8 ملیۆن مەتر سێجا ئاو گل بدەنەوە. بڕیاریشە ئەم ساڵ کار لەسەر دروستکردنی 18 بەنداوی دیکە بکرێت، هەروەها 23 گۆمی دەستکرد دروست کراون و 58 گۆمی دیکەش لە قۆناخی جێبەجێکردندان".
هەروەها هاتووە: "بەهۆی جێبەجێکردنی ژمارەیەک پڕۆژەی ستراتیژی گرنگی ئاو و دەستپێکردنەوەی کارکردن لە پڕۆژەکانی ئاو، کە پێشووتر بەهۆکاری قەیرانی دارایی وەستابوون، ئێستا نزیکەی 1100 بیری ئاو تەنیا لە شاری هەولێر لە پێناو پاراستنی سامانی ئاوی ژێر زەویی و رێگریکردن لە دروستبوونی وشکەساڵی داخراون".