رووداو دیجیتاڵ
وەزیری تەندروستیی هەرێمی کوردستان بەدواداچوونی بۆ رەوشی تەندروستیی ئەو هاووڵاتییانە کرد کە لە شاری زاخۆ ژەهراوی ببوون و فەرمانیدا رێکاری یاسایی بەرامبەر ئەو شوێنە بگیرێتەبەر کە بوەتە هۆی رووداوەکە.
رۆژی چوارشەممە 22ـی نیسانی 2026، سامان بەرزنجی، وەزیری تەندروستی لە پەیوەندییەکی تەلەفۆنیدا لەگەڵ بەڕێوەبەری گشتیی تەندروستیی زاخۆ، دکتۆر سیروان ئەحمەد، بەدواداچوونی بۆ رەوشی تەندروستیی زیاتر لە 75 هاووڵاتی کرد، کە بەهۆی خواردنی یەکێک لە چێشتخانەکانی ئەو شارە تووشی ژەهراویبوون ببوون.
وەزارەتی تەندروستی رایگەیاند، هەموو ئەو کەسانەی تووشی ژەهراویبوون بوون لە نەخۆشخانەی فریاکەوتنی زاخۆ پێشوازییان لێکراوە و چارەسەری پێویستیان بۆ ئەنجامدراوە.