میدیای فەرمیی ئێران: هاتووچۆی کەشتییە نەوتهەڵگرەکان لە گەرووی هورمز راگیراوە

میدیای فەرمیی ئێران، رۆژی شەممە، 28-2-2026 بڵاویکردەوە، جموجۆڵی کەشتییە نەوتهەڵگرەکان لە گەرووی هورمز راگیراوە و دەشڵێت، ئەرووپییەکان داوایان لە کەشتییە نەوتهەڵگرەکانیان کردووە لە گەرووی هورمزدا هاتووچۆ نەکەن.

پێشتر بەرپرسانی ئێران هۆشدارییان دابوو، ئەگەر هێرش بکرێتە سەریان گەرووی هورمز دادەخەن و رێگە بە جووڵەی بازرگانی کەشتییەکان نادەن.

هاوکات رۆژی شەممە، ئاژانسی رۆیتەرز بڵاویکردەوە، ژمارەیەک لە گەورە کۆمپانیاکانی نەوت و بازرگانی، گواستنەوەی نەوت و سووتەمەنییان لە گەرووی هورمزەوە راگرتووە، ئەوەش بەهۆی هێرشەکانی ئەمریکا و ئیسرائیل بۆ سەر ئێران و وەڵامدانەوەی تاران.

بەرپرسێکی باڵای بازرگانی بە رۆیتەرزی گوتووە: "کەشتییەکانمان بۆ چەند رۆژێک لە شوێنی خۆیان دەمێننەوە."