رووداو دیجیتاڵ
نێرۆز هۆری، ژنێکی هونەرمەندی خەڵکی عەفرینە و لە هۆڵەندا نیشتەجێیە، لە رێگەی کاری ئەنیمەیشنەوە کولتوور و بەرخودانی خەڵکی شارەکەی و جلوبەرگی کوردی دەناسێنێت.
منداڵەکەی کە ئۆتیزمی هەیە، بووەتە سەرچاوەی ئیلهام و پاڵنەری سەرەکیی کارە هونەرییەکانی. هۆری، بەهۆی بەرهەمەکانییەوە لە شاریقەی ئیمارات خەڵات کراوە و هەوڵدەدات لە رێگەی ئەنیمەیشنەوە کارەکانی زیاتر پەرەپێبدات.
دایکێکی گەنج لە گۆشەیەکی بچووکی ماڵەکەیدا بە رەنگ و خەیاڵ چیرۆکی بەهێز دەگێڕێتەوە و وێنە کارتۆنییەکانی پڕن لە هێمای کوردی.
خۆر، زەیتوون و جلوبەرگی کەلەپووری لە هونەرەکەیدا رەنگیان داوەتەوە و جیهانێکیان دروستکردووە کە مۆدێرنە و بە قووڵی بەستراوەتەوە بە کەلەپوورەوە.
نیرۆز هۆری، خەڵکی شاری عەفرینە، بە دیزاینە بێوێنەکانی ئازار و بەرخودانی گەلی کورد دەخاتە نێو کارەکتەرەکانییەوە و دەنگ بە چیرۆکی نەوەیەک دەبەخشێت.
نیرۆز هۆری، شێوەکار، رایگەیاند: "لەگەڵ شەڕی عەفرین، بە هەستێکی زۆرەوە دەستمان پێکرد. ویستمان هونەری وێنەکێشان لەبارەی کورد و ئازارەکانیانەوە پێشکێش بکەین، بەتایبەتی کە کۆمەڵگەی کوردی بەردەوام ئازار دەچێژێت.
بەهرەکەی ناسێنراوە و لە شاریقەی ئیمارات خەڵاتێکی وەرگرتووە، بەڵام ئەمە تەنیا هەنگاوێکە لە گەشتێکی درێژتردا.
بابەتی پەیوەندیدار
کولتوور 22/04/2026
بەڵگەفیلمێکی کوردی لە ئەمریکا خەڵاتێکی گەورە دەباتەوە
کولتوور 29/03/2026
لە هەڵخەڵەتاندنەوە بۆ مێژوو؛ گرووپی جێفەرسن ئەێرپلەین یادی 60 ساڵەیان دەکەنەوە
ئامانجی سەرەکیی ئەوەیە بچێتە نێو جیهانی ئەنیمەیشن و کارەکتەر و چیرۆکەکانی لەسەر شاشە زیندوو بکاتەوە.
نیرۆز هۆری، گوتیشی: "هەست دەکەم کارەکەم سنووردارە، بۆیە پێویستە چالاکییەکانم لەبارەی چیرۆکە کورتەکانەوە زیاتر بکەم، چونکە حەزم لەم بوارەیە و تێیدا باشم. دەتوانم خزمەتی کۆمەڵگەکەم بکەم و لە داهاتوودا سوودی هەبێت، ئەمە بۆ منداڵانیش باشە".
نیرۆز ماوەی شەش ساڵە لەگەڵ ماڵباتە بچووکەکەیدا لە هۆڵەندا دەژی و زۆرجار ئیلهام لە خۆشەویستیی بۆ کوڕە ئۆتیزمەکەی وەردەگرێت. ئەمەش ئامانجێکی نوێی پێ بەخشیوە کە هونەرەکەی بۆ کتێب و فیلمی کارتۆنی بۆ منداڵانی ئۆتیزم بەکاربهێنێت.
ئەو دەیەوێت یارمەتییان بدات خۆیان و جیهانیان بە شێوەیەکی نەرم و ببینن و هاوکات کۆمەڵگەش لەبارەی ئۆتیزمەوە هۆشیار بکاتەوە.
نیرۆز هۆری، ئاماژەی بەوەشکرد: "دوو ئامانجم هەیە؛ یەکەمیان ئەوەیە شتێک بۆ منداڵانی ئۆتیزم دروست بکەم، وەکو کتێبێک، بۆ ئەوەی خەڵک زیاتر ئەم حاڵەتە بناسن و لە داهاتوودا بتوانین پشتگیریی ئەو منداڵانە بکەین کە لە سووریا و رۆژئاوای کوردستان تووشبووی ئۆتیزمن. ئەو منداڵانە فەرامۆش کراون، کەس پشتگیرییان ناکات و لە ماڵەوەن. دەمەوێت لە رێگەی وێنەکانمەوە چیرۆکیان بۆ دروست بکەم، بیانفرۆشم و داهاتەکەی بۆ خزمەتی ئەوان بێت. ئامانجی دووەمیشم ئەوەیە کولتووری کوردی لە رێگەی وێنەکانمەوە دەربخەم و فیلمی ئەنیمەیشنی لەسەر دروست بکەم".