کەرامەت پارێزی سەرۆک مەسعود بارزانی و پیرۆزباییەکەی بایدەمیر

100 ساڵی تازەی کورد جیاواز دەبێت لە 100 ساڵی رابردوو. کورد یەکیگرتووە، بۆیە پێویستە پارتەکانی کوردستان چیدیکە ئەو یەکێتییە تێکنەدەن. دەنگی بڕنەوی پێشمەرگەکانی شۆڕشی ئەیلوول، کوردی لە هەموو پارچەکانی کوردستان بۆ یەکەم جار یەکخست. ئەوەتا کەسێکی وەکو مەهدی زانا دەڵێت، ئەوەندە گوشاریان خستبووە سەرمان لە ساڵانی پەنجا و شەست و حەفتاکان دا، ئەوەندە بە خراپە باسی پێشمەرگە و بارزانی-یان دەکرد، بڕیارم دا لە نیوەشەوێکی ئەنگوستە چاودا لەسەر دیواری یەکێک لە گەڕەکەکانی شارەکەم بە گەورەیی بە کوردی بنووسم: بژی بارزانی.

ئێستاش رۆژئاوای کوردستان هەموو کوردی یەکخستووە. کورد بە هێرشکردنە سەر رۆژئاوای کوردستان دانەنیشت بگریێت، کورد لە هەموو بوارێکدا هەستاوەتە سەرپێ بۆ بەرگریکردن لە رۆژئاوای کوردستان بە هەموو شێوەیەک.

یەکێک لە میوانانی دیداری پرۆفیسۆر عیزەددین مستەفا رەسووڵ کە رۆژانی (23 و 24-01-2026) لە سلێمانی سازکرا، سەرۆکی پێشووتری گەورەشارەوانیی ئامەد (دیاربەکر) کاک عوسمان بایدەمیر بوو. بایدەمیر دوای ئەوەی ئەو ڤیدیۆیە بڵاوکرایەوە کە تێیدا سەرۆکی پەرلەمانی تورکیا لێی دەپرسێت: بەڕێز بایدەمیر کوردستان لە کوێیە؟ عوسمان بایدەمیر دەزانێت ناتوانێت لەسەر نەخشەی جیهان کوردستان بە سەرۆکی پەرلەمان نیشانبدات، بە قایمی دەستی راستی دەکێشێت بەسەر دڵی خۆی دا و دەڵێت، باشکانی بەڕێز ئەوەتا کوردستان لێرەدایە، مەبەستی ناو دڵیەتی. ئیدی ئەو ڤیدیۆیە بووە پووشویەک و گڕی لە هەستی نەتەوەیی کورد بەردا، بایدەمیریش بووە کەسایەتییەکی ناسراوی سەرتاسەریی کوردستان.

بایدەمیر سیاسەتڤانێکە ئەوەی لە دڵیدایە لەسەر زاریەتی و بێباکە. لەو دیدارەدا بەسەرهاتێکی گێڕایەوە کە تراژدی هەرواش کۆمیدی بوو، گوتی، "ساڵی 2006 بەبۆنەی سەری ساڵی نوێ دەمویست سوپرایزێک بکەم، هاتم بە هەرسێ زمانی کوردی، تورکی و ئینگلیزی پیرۆزبایی جەژنی سەری ساڵم بۆ هەموو پارێزگارەکان، ئەندام پەرلەمان، رۆژنامەڤان و پارێزەران و هەرچی توێژی ئەو وڵاتەیە کە نزیکەی زیاتر لە پێنج هەزار نامە دەبوو، نارد. بەو سێ زمانە پێم گوتن: سەر ساڵا وە پیرۆزبیت! سەیرەکە لەوەدا بوو نەک بە کوردی، بەڵکو بە ئینگلیزی و تورکیش وەڵامی پیرۆزباییەکەیان نەدامەوە، بە پێچەوانەوە هەموویان نامەکەیان بۆ ناردمەوە و قبووڵیان نەکرد تەنیا لەبەرئەوەی بە کوردی نووسیبوم، جەژنا سەر ساڵە وە پیرۆزبیت! تەنیا شوێنێک کە وەڵامی نەدامەوە و نامەکەی منیشیان نەناردەوە، دادگای دیاربەکر بوو، بە برادەرەکانم گوت: شتێکی چاکە مادام دادگا نامەکەی منیان نەناردووە بۆ خۆم، کەواتە دژایەتیی زمانی کوردییان نەکردووە، قەیناکە با ئەوان جەژنە پیرۆزەمان لێ نەکەن."

بەڵام دوای مانگێک فیلمەکە لەوێوە دەستپێدەکات کە دادگای دیاربەکر بە بیانوی ئەوەی یاسای پەیڕەوی زمانی تورکیی پێشێل کردووە، بایدەمیر راپێچی دادگا دەکەن و دەست بە لێپێچینەوە دەکەن! دادوەر پێی دەڵێت، بۆ خۆت دەزانی بۆچی دادگاییت دەکەین، یاسای زمانەکانت پێشێل کردووە و بە زمانی کوردی جەژنی سەری ساڵت پیرۆز کردووە، لەوەش خراپتر بە بەکارهێنانی پیتی (و - W) یاسا زمانییەکانی تورکیات پێشێلکردووە! بایدەمیر بە حەسرەتەوە درێژەی بە بەسەرهاتەکە دا و گوتی، بە دادوەرم گوت: قوربان ئەوە کەی پێشێلکردنە؟! ئەوە نییە وشەی (دەبلیوو) لە پیرۆزباییەکەدا بە زمانی ئینگلیزییش هەیە، ئەی بۆ ئەوەیان قەدەخە نییە؟! دادوەر دەڵێت ئەوە باسێکی دیکەیە.