رووداو - تەندروستی
شاکیرا، خانمەگۆرانیبێژی کۆڵۆمبیایی لە دواین چاوپێکەوتنی بۆ کەناڵێکی ئیسپانی چەند نهێنییەکی ژیانی خۆی ئاشکرا دەکات و یەکێکیان لەبارەی پەروەردەکردنی منداڵەکانیەتی؛ ئەو دەڵێت: رێسای تووند پەیڕەو دەکەم بۆ ئەوەی لە کاریگەریی زووی جیهانی دیجیتاڵی بیانپارێزم.
شاکیرا لەمیانەی بەشداربوونی لە بەرنامەی Al Cielo con Ellaـی ئیسپانی روونی کردەوە، منداڵەکانی تاوەکو ئێستا مۆبایلیان نییە، ئەمەش بۆ ئەوە دەگەڕێنێتەوە کە دەیەوێت رێگری لە پەیوەستبوونیان بکات لەو تەمەنە بچووکەدا.
بەگوتەی ئەو خانمە کۆڵۆمبیاییە، بەکارهێنانی هەندێک پلاتفۆرمی دیجیتاڵی وەکو یوتیوب سنووردار دەکات بەجۆرێک لە چوارچێوەی سیاسەتێکی ماڵەوەدا کە ئامانج لێی کەمکردنەوەی بەرکەوتنی ئاراستەنەکراوە لەگەڵ نێوەڕۆکی ئەلیکترۆنی و گرنگیدانە بە چالاکییە واقیعی و ئەزموونە رۆژانەییەکان.
ئەو پێی وایە، سەردەمی منداڵی دەبێت لەسەر بنەمای ئەزموونی راستەوخۆ و کارلێکی راستەقینە لەگەڵ ژیاندا بنیاد بنرێت، لەبری پشت بەستن بە جیهانی گریمانەیی، بەتایبەتی لەژێر سێبەری بڵاوبوونەوەی بەربڵاوی ئامێرە زیرەکەکان لەنێو منداڵاندا لە تەمەنێکی زووەوە.
بابەتی پەیوەندیدار
تەندروستی 28/04/2026
تەندروستیی جیهانی یەکەم چارەسەری مەلاریای بۆ منداڵانی ساوا پەسند کرد
تەندروستی 28/04/2026
پسپۆڕێکی منداڵان: دواخستنی کوتانی منداڵەکانتان مەترسیدارە
ئەمەش بزانە
شاکیرا لە 2ـی شوباتی 1977 لە کۆلۆمبیا لەدایکبووە و بە رەچەڵەک لوبنانییە، بە شاژنی میوزیکی لاتینی دەناسرێت، لە تەمەنی 13 ساڵییەوە دەستی بە کاری هونەری کردووە، ئێستا خاوەنی دوو منداڵە بە ناوەکانی (میلانی تەمەن 13 ساڵ و ساشای تەمەن 11 ساڵ) دوو ئەلبوومی سەرەتای بەناوەکانی "Magia" لە 1991 و "Peligro" لە 1993 لە رووی داهاتەوە شکستیان هێنا، بەڵام ئەلبوومی "Pies Descalzos" لە 1995 سەرکەوتنی گەورەی بەدەستهێنا.
لە 2001 یەکەم ئەلبوومی بە زمانی ئینگلیزی بەناوی "Laundry Service" بڵاوکردەوە و دەستپێکی بە جیهانیبوونی ئەو هونەرمەندە بوو، زیاتر لە 13 ملیۆن کۆپیی فرۆشرا، کۆی گشتی ئەلبوومەکانی زیاتر لە 95 ملیۆن کۆپییان فرۆشراون.
