رووداو دیجیتاڵ
کاژێر 12:20 خولەکی ئەمشەو دوو بڵێسەی ئاگر لە ئاسمانی چیای کۆڕەک بیندران و لەگەڵیدا دەنگی بەهێز بیستران.
سەرچاوەیەک لە ئاسایشی خەلیفان بە رووداوی رایەگاند، هێرشێک بە دوو درۆن کراوە و درۆنەکان لەسەر بەرزایی کۆڕەک کەوتوونەتە خوارەوە.
ئەو سەرچاوەیە گوتیشی لەماوەی پێنج رۆژی رابردوودا ئەمە جاری حەوتەمە درۆن لە چیای کۆڕەک دەکەونە خوارەوە و تائیستا هیچیان زیانی گیانیان لێ نەکەوتووەتەوە.
ئەمە لە کاتێکدایە، ئەمشەو ژمارەیەک درۆن لە سنووری پارێزگاکانی هەولێر و دهۆک کەوتنە خوارەوە.
ئەندام جەبار، پەیامنێری تۆڕی میدیایی رووداو لە سۆران، ئەمشەو رایگەیاند، نزیکەی 9:50 خولەکی ئەمشەو هاونیشتمانییانی سۆران گوێیان لە دەنگی تەقینەوەیەکی گەورە بوو.
ئەندام جەبار گوتی، درۆنەکە لە نزیک ماڵی شەهید عال موهاجیر کەوتوەتە خوارەوە و هەر زوو هێزە ئەمنییەکان گەیشتنە شوێنەکە بە مەبەستی لێکۆڵینەوە.
هاوکات هەر ئەمشەو، درۆنێک لە سنووری گوندی کەوەرتە لە سنووری چۆمان لە ئیدارەی سەربەخۆی سۆران کەوتە خوارەوە.
بەختیار قادر، پەیامنێری رووداو گوتی، درۆنەکە لە چۆڵەوانییەک کەوتوەتە خوارەوە و هیچ زیانێکی نەبووە.