گەنجێکی دهۆک لە کۆنسوڵخانەی ئەمریکا سەرتاش بووە و نزیکەی حەوت مانگە بێسەروشوێنە

بەپێی بەدواداچوونەکان، دوایین جار لە کەرکووکەوە پەیوەندیی کردووە، هەربۆیە خێزانی کوڕەکە لە هەولێر و کەرکووکیش سکاڵایان تۆمار کردووە، بەڵام هێشتا چارەنووسی کوڕەکەیان نادیارە.

خالید محەممەد عەلی، باکوی نێچیرڤان دەڵێت، "چووینە کۆنسوڵخانە و پرسیارمان کرد، گوتیان کاری خۆی تەواو کردووە و دەرچووە. گوتمان کامێرامان بۆ لێدەنەوە، گوتیان بڕۆنە دادگە. چووینە دادگە، بەڵام رێگە نادەن کامێرامان بۆ لێدەنەوە. نووسراومان بۆ ئاسایشی گشتی و کۆمپانیای کۆڕەک نارد، ئەوە حەوت مانگە هیچ دیار نییە."

نێچیرڤان تەمەنی 34 ساڵە، هاوسەرگیریی کردووە و خاوەنی دوو منداڵە. عاسمە ئەحمەد، دایکی نێچیرڤان دەڵێت، "کوڕەکەم بێ کێشەیە، هەمووان دەزانن کە سرووشتی ئەو چۆنە، مامەکانی و کوڕەکانی مامی دەزانن کە کوڕەکەم تەنیا کاری خۆی دەکات و دەگەڕێتەوە ماڵەوە."

چیرۆکی بێسەروشوێنبوونی نێچیرڤان خێزانەکەیی تووشی شڵەژان کردووە و چاوەڕوانن زانیاری لەبارەی چارەنووسی کوڕەکەیانەوە بزانن.