تورکیا 13 کورسیی خوێندنی باڵا بە فێرخوازانی هەرێمی کوردستان دەدات

رۆژی یەکشەممە، 19ـی کانوونی یەکەمی 2025، وەزارەتی خوێندنی باڵای هەرێمی کوردستان بڵاویکردەوە، "8 کورسی بۆ دامودەزگاکانی وەزارەتی خوێندنی باڵا و توێژینەوەی زانستی دەبێت، پێنج کورسیی دیکەیش بۆ تەواوی وەزارەتەکانی دیکەیە."

عەباس ئەکرەم، گوتەبێژی وەزارەتی خوێندنی باڵا و توێژینەوەی زانستیی هەرێمی کوردستان بە تۆڕی میدیایی رووداوی گوت، "ئەو دەستپێشخەرییەی تورکیا، دوای سەردانی ئارام محەممەد قادر، وەزیری خوێندنی باڵا دێت بۆ ئەو وڵاتە و بەسەرکردنەوەی دامەزراوەکانی خوێندنی باڵا."

گوتەبێژی وەزارەتی خوێندنی باڵا دەڵێت، "ساڵی رابردوو، شاندێکی وەزارەتی خوێندنی باڵا چووە تورکیا و کۆمەڵێک کۆبوونەوە و چاوپێکەوتنی لەگەڵ دامودەزگاکانی ئەو وڵاتە هەبوو، لێکتێگەیشتنی باش لەنێوان هەردوولا دروستبوو، لەو چوارچێوەیەدا تورکیا بڕیاری دا 13 کورسیی خوێندنی باڵا پێشکێش بە فێرخوازانی هەرێمی کوردستان بکات."

1-  پێشکەشکار دەبێت فەرمانبەر یان مامۆستا بێت لە دامودەزگاکانی حکومەتی هەرێمی کوردستان.

2-  پێشکەشکار دەبێت بە لایەنی کەم دوو ساڵ خزمەتی هەبێت لە پاش بەدەستهێنانی دوایین بڕوانامە. 

3- پێشکەشکار دەبێت کۆنمرەی بەکالۆریۆسی لە 65 کەمتر نەبێت بۆ خوێندنی ماستەر و لە 70 کەمتر نەبێت بۆ خوێندنی دکتۆرا.

4- ئاستی توانستی زمانی داواکراو لە بەرنامەیەک بۆ بەرنامەیەک جیاوازە، بۆیە بەر لە پێشکەشکردن، تکایە تەواوی وردەکارییەکانی ئەم بەرنامەیە بخوێننەوە کە داواکاری بۆ پێشکەش دەکەن. 

5- داواکار دەبێت لە هەمان بواری خۆی داواکاری بۆ بەرنامە پێشکەش بکات. (واتا بەکالۆریۆس و ماستەرەکەی لە هەمان بوار بێت بۆ خوێندنی ماستەر، ماستەر و دکتۆراکەی لە هەمان بوار بێت بۆ خوێندنی بەرنامەی دکتۆرا).

6- کاندیدی سەرکەوتوو لەلایەن وەزارەتەکەمان تەنها مۆڵەتی خوێندنی پێدەدرێت واتا بە مووچەی بنەڕەتی و دەرماڵە جێگیرەکان.

7- کاندیدی سەرکەوتوو لەلایەن وڵاتی تورکیا پشتگیری دارایی دەکرێت، بۆ وردەکاریی زیاتر تکایە سەردانی ماڵپەڕی زەمالەکە بکەن.

هەر لە راگەیێندراوەکەدا هاتووە، "هەر کەسێک ئەو مەرجانەی تێدایە و ئارەزووی خوێندن لە تورکیا دەکات، لەم لینکەوە فۆرم پێشکێش بکات.

گوتەبێژی خوێندنی باڵا گوتی، "هەرکەسێک ئەو مەرج و رێنماییانەی تێدا نەبێت، مۆڵەتی خوێندنی پێنادرێت". دەشڵێت، کاتی پێشکێشکردن لە 10-01-2025ـەوە دەستپێدەکات."

بۆ هەر کەسێک کە زەمالەکە وەردەگرێت، بۆ پڕکردنەوەی فایل سەردانی ئەم لینکە بکات. 

وەزارەتەکە باسی لەوە کردووە: "دوای پێشکەشکردن لەڕێگەی ئۆنلاین، ئەم زانیارییانەی خوارەوە لە رێگەی ئیمێلی (maqsood.mohammed@mhe-krg.org) بۆ وەزارەتەکەمان رەوانە بکەن".

Full name:

Application No.:

Applied program:

Email address:

Telephone No.:

Copy of the application