رووداو دیجیتاڵ
بەگوێرەی ماڵپەڕی شەفافیەت، داهاتی هەفتەیەکی سنووری پارێزگاکانی سلێمانی و هەڵەبجە، ئیدارە سەربەخۆکانی گەرمیان و راپەڕین بەراورد بە هەفتەیەک پێشتر 8% دابەزیوە.
ماڵپەڕی شەفافییەت بڵاویکردەوە، لە 17ـی ئاب تاوەکو ئەمڕۆ هەینی، 23ـی ئابی 2024، داهاتی سنوورەکە 12 ملیار و 403 ملیۆن و 913 هەزار و 740 دینار بووە، لە کاتێکدا هەفتەی پێشتر 13 ملیار و 586 ملیۆن و 843 هەزار و 8750 دینار بووە.
ماڵپەڕەکە ئاماژەی بەوەشکردووە، ئەم هەفتەیە بەراورد بە هەفتەی پێشتر، داهاتی سنوورەکە 8.7% کەمیکردووە.
داتاکان داهاتە نانەوتییەکانی خستووەتەڕوو. بەگوێرەی ماڵپەڕەکە، داهاتی نانەوتیی ئەو سنوورانە لە ساڵی 2023دا زیاتر لە یەک تریلیۆن و 173 ملیار و 996 ملیۆن دینار بووە.
داهاتی نێوخۆ جگە لە خەرجیی فەرمانگەکان، پێشتر بۆ دابینکردنی ئەو کورتهێنانە خەرج دەکرا کە بۆ پێدانی مووچە دروست دەبوو. بەگوێرەی رێککەوتنی نوێی هەولێر و بەغدا، لەمەودوا بەشێکی داهاتی نانەوتی رادەستی بەغدا دەکرێت.
رۆژی 15-12-2022 قوباد تاڵەبانی، جێگری سەرۆکی حکومەتی هەرێمی کوردستان ماڵپەڕی شەفافیەتی راگەیاند.
ماڵپەڕی شەفافیەت لە هەشت بەش پێکدێت و لەلایەن نووسینگەی جێگری سەرۆکی حکومەتەوە سەرپەرشتی دەکرێت و دروشمەکەی "بە سیستمکردن و دیجیتاڵکردنی خزمەتگوزارییەکانی هاووڵاتییان لە دامودەزگاکانی حکومەت"ـە.