رووداو دیجیتاڵ
بافڵ جەلال تاڵەبانی، سەرۆکی یەکێتیی نیشتمانیی کوردستان، لە پەیامێکی فەرمیدا پیرۆزبایی لە عەلی زەیدی کرد بەبۆنەی راسپاردنی بۆ پێکهێنانی حکومەتی نوێی عێراق و ئامادەیی حزبەکەشی بۆ سەرخستنی کابینە نوێیەکە دەربڕی.
سەرۆکی یەکێتی لە پەیامەکەیدا وێڕای هیوای باش بۆ عەلی زەیدی لەم ئەرکەیدا، رایگەیاند: "پیرۆزبایی خۆمان ئاڕاستەی بەڕێز عەلی زەیدی دەکەین بەبۆنەی راسپاردنیان وەکو سەرۆکوەزیرانی عێراق و هیوای باشترین بۆ بەڕێزیان دەخوازین لەم ئەرکە گرنگەدا."
بافڵ تاڵەبانی جەختی لەوە کردەوە کە یەکێتی هاوکار و یارمەتیدەر دەبێت بۆ پێکهێنانی حکومەتێکی بەتوانا و گشتگیر، بە مەبەستی رووبەڕووبوونەوەی ئەو ئاڵنگارییانەی ئێستا عێراقیان گرتووەتەوە.
بابەتی پەیوەندیدار
کوردستان28/04/2026
وەزارەتی ئەوقاف: جەژنی قوربانی پیرۆز 26 یان 27ی ئایار دەبێت
کوردستان28/04/2026
دوو کەس لە پارێزگای ورمێ بە رووداوی هاتووچۆ گیانیان لەدەستدا
دەشڵێت: "هاوکاریی ئەو حکومەتە دەبین تاوەکو عێراق لەو قەیرانە ئابووری و ئەمنییانە دەرباز بکات کە رووبەڕووی بووەتەوە."
لە کۆتایی پەیامەکەیدا، سەرۆکی یەکێتی نیشتمانیی کوردستان پشتیوانیی تەواوی خۆی بۆ حکومەتی داهاتوو دەربڕی و ئاماژەی بەوە کرد کە بەردەوام دەبن لە هەوڵەکانیان بۆ بەهێزکردنی هەماهەنگییەکان، بەو ئاراستەیەی کە "خزمەت بە بەرژەوەندییە باڵاکانی گەل و سەقامگیریی وڵات بکات".
چوارچێوەی هاوئاهەنگیی شیعەکان لە کۆبوونەوەی ئێوارەی ئەمڕۆ دووشەممەدا بە فەرمی بەربژێرکردنی عەلی زەیدی بۆ پۆستی سەرۆکوەزیرانی عێراقی راگەیاند و دواتر لەلایەن سەرۆککۆمارەوە راسپێردرا بۆ پێکهێنانی حکومەتی نوێی عێراق. سەرۆکوەزیران دەبێت لە ماوەی 30 رۆژدا کابینەکەی پێشکەشی پەرلەمان بکات.