رووداو دیجیتاڵ
نوێنەری عێراق لە کۆمکاری عەرەبی دەڵێت، بەپێی دەستوور رێگە نادرێت خاکی عێراق بۆ هێرشکردنە سەر وڵاتانی دیکە بەکاربهێنرێ؛ ئاماژە بەوەش دەکات کە "ئیسرائیل هۆکاری سەرەکیی پشێوییەکانی ناوچەکەیە."
ئەمڕۆ سێشەممە 21ی نیسانی 2026، قەحتان تەها خەلەف، باڵیۆزی عێراق لە قاهیرە و نوێنەری عێراق لە کۆمکاری عەرەبی، سەرۆکایەتیی شاندی عێراقی لە کۆبوونەوەیەکی نائاسایی وەزیرانی دەرەوەی عەرەب کرد، کە بە شێوەی ئۆنلاین بۆ تاوتوێکردنی دوایین پێشهاتەکانی ناوچەکە بەڕێوەچوو.
وەزارەتی دەرەوەی عێراق لە راگەیێندراوێکدا ئاماژەی بەوە کرد، لە کۆبوونەوەکەدا باس لەو هێرشانە کراوە کە دەکرێنە سەر وڵاتانی ناوچەکە و لێکەوتە ئەمنییەکانیان.
قەحتان تەها خەلەف لە گوتارەکەیدا رایگەیاند: "حکومەتی عێراق سوورە لەسەر دروستکردنی پەیوەندییەکی پتەو لەگەڵ برا عەرەبەکانی، ئەمەش لە دەستووری عێراقەوە سەرچاوە دەگرێ کە بە روونی رێگری دەکات لە بەکارهێنانی خاکی وڵات بۆ هێرشکردنە سەر هەر وڵاتێکی دیکە.
بابەتی پەیوەندیدار
رۆژهەڵاتی نێوەڕاست29/04/2026
ناوەندی توێژینەوەی کەنداو بۆ رووداو: نزیکەی 6000 مووشەک و درۆن ئاراستەی وڵاتانی کەنداو کراون
رۆژهەڵاتی نێوەڕاست29/04/2026
سعودیە رێکاری پێدانی ڤیزا بە عێراقییەکان دەگۆڕێت و دەگەڕێتەوە بۆ سیستمی کۆن
"
نوێنەرەکەی عێراق ئاماژەی بەوە کرد، حکومەت رێکاری پێویست دەگرێتەبەر بۆ رێگریکردن لە هەر کارێکی لەو شێوەیە ئەگەر بسەلمێندرێت؛ هەروەها باسی لەوە کرد کە "عێراق خۆی رووبەڕووی هێرشی لایەنە جیاوازەکانی جەنگەکە بووەتەوە و چەندین جار دامەزراوەی مەدەنی و سەربازییەکانی سوپای عێراق کراونەتە ئامانج."
نوێنەرەکەی عێراق رایگەیاند: "عێراق پێیوایە ئیسرائیل هۆکاری سەرەکیی ئەو پشێوییەیە کە ناوچەکە بەخۆیەوە دەبینێت" و داواشی کرد کە چاوپۆشی لە ئامانج و سیاسەتە فراوانخوازییەکانی ئیسرائیل نەکرێ کە "هەڕەشە لە سەقامگیریی ناوچەکە دەکەن".