رووداو دیجیتاڵ
وەزیری بەرگریی ئیسرائیل رایگەیاند، وڵاتەکەی ئامادەکاری پێویستی کردووە بۆ دەستپێکردنەوەی هێرشەکانی بۆ سەر ئێران و چاوەڕێی گڵۆپی سەوزی ئەمریکان.
یسرائیل کاتز، وەزیری بەرگریی ئیسرائیل رایگەیاند، "ئیسرائیل ئامادەیە بۆ دەستپێکردنەوەی جەنگ دژی ئێران و ئامانجەکانیش دیاریکراون".
وەزیری بەرگریی ئیسرائیل دەشڵێت، "ئێمە چاوەڕێی گڵۆپی سەوز لە ئەمریکا دەکەین، بەر لە هەر شتێک بۆ تەواوکردنی لەناوبردنی بنەماڵەی خامنەیی، کە داڕێژەری پلانی قڕکردنی ئیسرائیلن و هەروەها لەناوبردنی جێگرەوەکانی سەرکردایەتیی" ئێران.
رۆژی 28ی شوبات، واشنتن و تەلئەڤیڤ هێرشیانکردە سەر تاران و ئەویش بە هێرشکردنە سەر ئیسرائیل و وڵاتانی کەنداو وەڵامی هێرشەکانیان دایەوە. رۆژی 8ی نیسان، ئەمریکا لەسەر پێشنیازی پاکستان ئاگربەستێکی دوو هەفتەیی راگەیاند و رۆژی سێشەممەش دۆناڵد ترەمپ، سەرۆکی ئەمریکا ئاگربەستەکەی بۆ کاتێکی نادیار درێژکردەوە.
بابەتی پەیوەندیدار
رۆژهەڵاتی نێوەڕاست29/04/2026
ناوەندی توێژینەوەی کەنداو بۆ رووداو: نزیکەی 6000 مووشەک و درۆن ئاراستەی وڵاتانی کەنداو کراون
رۆژهەڵاتی نێوەڕاست29/04/2026
سعودیە رێکاری پێدانی ڤیزا بە عێراقییەکان دەگۆڕێت و دەگەڕێتەوە بۆ سیستمی کۆن
لە دەستپێکی جەنگەکەوە، ئەمریکا و ئیسرائیل کوشتنی زیاتر لە 50 سەرکردەی باڵای ئێرانیان راگەیاندووە و زۆرینەشیان پشتڕاستکراونەتەوە؛ دیارترینیان عەلی خامنەیی، رێبەری پێشووی ئێرانە.
وەزیری بەرگریی ئیسرائیل گوتی، "کاتێک ئەمجارە هێرشەکە دەستپێدەکاتەوە، جیاواز و کوشندە دەبێت و گورزی وێرانکەر لە پڕئازارترین شوێنەکان زیاد دەکات، ئەوەش دوای ئەو گورزە گەورە و بەهێزانەی کە رژێمی تێرۆریستیی ئێران تاوەکو ئێستا بەریکەوتووە، کە بنەماکانی دەهەژێنێت و دەیروخێنێت."
رۆژانی 11 و 12ی نیسان، شاندی ئەمریکا و ئێران لە پاکستان دانوستاندنیان کرد و بڕیاربوو هەفتەی رابردووش کۆببنەوە بەڵام کۆبوونەوەکە نەکرا.
رۆژی چوارشەممە، سەرۆکی ئەمریکا رایگەیاند، پێشبینی دەکەن تاوەکو رۆژی هەینی هەواڵی دڵخۆشکەر بۆ دانوستاندن لەگەڵ ئێران هەبێت.