رووداو دیجیتاڵ
سەرچاوەیەکی ئەمنیی ئیسرائیل رەتیدەکاتەوە وڵاتەکەی هێرشی ئاسمانیی نوێی کردبێتە سەر ئێران، ئەوەش دوای ئەوەی میدیاکانی تاران بڵاویانکردەوە کە دەنگی چەند تەقینەوەیەک لە ئاسمانی پایتەخت بیستراوە.
سەرچاوەیەکی ئەمنیی ئیسرائیلی کە نەیویستووە ناوی ئاشکرا بکرێت، ئەمڕۆ پێنجشەممە 23ی نیسانی 2026، بە ئاژانسی فرانس پرێسی راگەیاندووە: "لەم کاتەدا ئیسرائیل هیچ هێرشێک ناکاتە سەر ئێران."
ئەم روونکردنەوەیەی ئیسرائیل لە کاتێکدایە کە میدیای فەرمیی ئێران پێشتر بڵاویکردبووەوە، چەند تەنێکی دژبەر لە ئاسمانی تاران بینراون، سیستمی بەرگریی ئاسمانی چالاک کراوە و دەنگی چەند تەقینەوەیەک لە ئاسمانی تارانی پایتەخت بیستراوە، کە ئەمەش ترسی لای خەڵک دروستکردبوو لەوەی رەنگە هێرشی نوێ دەستیپێکردبێت.
پێشتر هەر لە رۆژی پێنجشەممەدا، ئیسرائیل کاتز، وەزیری بەرگریی ئیسرائیل هەڕەشەی تووندی لە ئێران و گوتی ئیسرائیل "ئامادەیە بۆ دەستپێکردنەوەی جەنگ دژی ئێران." هەروەها ئاماژەی بەوەش کردبوو کە وڵاتەکەی تەنیا چاوەڕێی گڵۆپی سەوزی ئەمریکا دەکات بۆ ئەوەی ئێران بگەڕێنێتەوە بۆ "سەردەمی بەردین."