نێچیرڤان بارزانی دەچێتە بەغدا

سبەی دووشەممە، 4ـی ئایاری 2026، نێچیرڤان بارزانی وەک سەرۆکی هەرێم و جێگری سەرۆکی پارتی، دەچێتە بەغدا. لەسەر پێکهێنانی حکومەتی تازەی عێراق لەگەڵ لایەنەکانی چوارچێوەی هاوئاهەنگی کۆدەبێتەوە. 

هاوکات، لەسەر ئەنجامی ئەو کۆبوونەوانەش قسە دەکەن، عەلی زەیدی لەگەڵ لایەنەکانی کوردستان کردوونی.

سەرکردەکانی عێراق، چاویان لەوەیە ئەم سەردانەی سەرۆکی هەرێمی کوردستان، کۆتایی بەو کێشانە بهێنێت کە پێشتر لە نێوان هەولێر و بەغدا هەبوون، تاوەکو لە میانی حکومەتی نوێدا، بە یاسا و دەستوور رێگەچارەی کۆنکرێتییان بۆ بدرۆزرێتەوە.

ئێوارەی رۆژی دووشەممە، 27ـی نیسانی 2026، عەلی فالح زەیدی بە مەبەستی پێکهێنانی کابینەی نوێی حکومەتی عێراق راسپێردرا و 30 رۆژی لەبەردەمە بۆ پێکهێنانی کابینەکەی.

رۆژی 2ی ئایاری 2026 عەلی زەیدی بۆ گفتوگۆکردن لەسەر پێکهێنانی کابینەی نوێی حکومەت سەردانی هەرێمی کوردستانی کرد. دوای کۆبوونەوەی لەگەڵ سەرۆک بارزانی، نێچیرڤان بارزانی و مەسرور بارزانی لە هەولێر، سەردانی سلێمانی کرد و لەگەڵ بافڵ تاڵەبانی، شاسوار عەبدولواحید، رەوتی هەڵوێست و کۆمەڵی ئیسلامی کۆبووەوە.