رووداو دیجیتاڵ
هاوپەیمانیی چوارچێوەی هاوئاهەنگی دەڵێ، لە کۆبوونەوەیان لەگەڵ نێچیرڤان بارزانی باسیان لە پرسەکانی تایبەت بە پێکهێنانی حکومەتی نوێی عێراق کردووە و شاندەکە چەند پێشنیازێکی خستووەتەڕوو بۆ دەوڵەمەندکردنی کارنامەی حکومەتەکە.
دووشەممە 4ی ئایاری 2026، هاوپەیمانیی چوارچێوەی هاوئاهەنگی راگەیێندراوێکی لەبارەی کۆبوونەوەی لەگەڵ نێچیرڤان بارزانی، سەرۆکی هەرێمی کوردستان و جێگری سەرۆکی پارتی بڵاوکردەوە.
ئەو هاوپەیمانێتییە رایگەیاند، لیژنەی سەرکردایەتیی چوارچێوەی هاوئاهەنگی تایبەت بە دانوستاندنەکانی پێکهێنانی حکومەت لەگەڵ شاندێکی پارتی دیموکراتی کوردستان بە سەرۆکایەتیی نێچیرڤان بارزانی کۆبووەوە و تاوتوێی چەند دۆسیەیەک و پرسێکی پەیوەندیدار بە پێکهێنانی حکومەتیان کرد.
بەگوێرەی راگەیێندراوەکە، "شاندەکەی پارتی دیموکراتی کوردستان بە سەرۆکایەتیی نێچیرڤان بارزانی، سەرۆکی هەرێمی کوردستان چەند پێشنیاز و تێڕوانینێکی خستەڕوو کە دەکرێ رۆڵیان هەبێ بۆ دەوڵەمەندکردنی کارنامەی حکومەت، بە شێوەیەک کە خواستەکانی هاووڵاتییان دەستەبەر بکرێ و سەقامگیریی سیاسیی وڵات بەهێز بکرێ."
هاوپەیمانیی چوارچێوەی هاوئاهەنگی باس لەوە دەکات، لە کۆبوونەوەکەدا ئاڵوگۆڕی تێڕوانینەکان لەبارەی شێوازەکانی هاوکاریی نێوان هێزە سیاسییەکان کراوە، جەختیان کردووەتەوە لە گرنگیی لێکتێگەیشتنی هاوبەش بۆ گەرەنتییکردنی پێکهێنانی حکومەتێک کە بتوانێت رووبەڕووی ئاڵنگارییەکان ببێتەوە، گەشەپێدان و خزمەتگوزاری بهێنێتە دی.
بابەتی پەیوەندیدار
دووشەممە نێچیرڤان بارزانی بە سەردانێک چووە بەغدا و لە نووسینگەی نووری مالیکی، سەرۆکی هاوپەیمانیی دەوڵەتی یاسا، لەگەڵ سەرکردەکانی هاوپەیمانیی چوارچێوەی هاوئاهەنگی کۆبووەوە.
بڕیارە پاشنیوەڕۆی ئەمڕۆ نێچیرڤان بارزانی کۆبوونەوەیەکی دیکە لەگەڵ ئەنجوومەنی سیاسیی نیشتمانیی سوننەکان ئەنجام بدات.
هەریەکە لە فوئاد حوسێن، وەزیری دەرەوەی عێراق و ئەندامی مەکتەبی سیاسیی پارتی دیموکراتی کوردستان؛ فەوزی هەریری، سەرۆکی دیوانی سەرۆکایەتی هەرێمی کوردستان؛ فەلاح مستەفا، یاریدەدەری سەرۆکی هەرێمی کوردستان؛ نووری عوسمان، بەرپرسی نووسینگەی سەرۆکی هەرێمی کوردستان؛ عەبدولحەکیم خەسرۆ، سەرۆکی فەرمانگەی هاوئاهەنگی و بەدواداچوونی حکومەتی هەرێمی کوردستان یاوەری نێچیرڤان بارزانین.
سەرۆکایەتیی هەرێمی کوردستان بەرەبەیانیی ئەمڕۆ رایگەیاند، نێچیرڤان بارزانی لە ميانى سەردانەکەیدا زنجیرەیەک کۆبوونەوە لەگەڵ سەرکردە و بەرپرسانی باڵای عێراق ئەنجام دەدات و تێیاندا پرۆسهى سیاسی، پێكهێنانى حكومهتى نوێى عێراقى فيدراڵى، پەیوەندییەکانی هەولێر و بەغدا و چەندین پرسی دیکە تاوتوێ دەکرێن.