رووداو دیجیتاڵ
عەممار حەکیم ، سەرۆکی رەوتی حیکمەی نیشتمانیی رایگەیاند کە لایەنە شیعەکان لە (چوارچێوەی هاوئاهەنگی) دا پەرلەمانتارانی خۆیان ئازادکردوون لە دەنگدان بە هەر بەربژێرێکی سەرۆککۆمار و، رایگەیاند کە هاوڕا نییە لەگەڵ ئەو سەرکردانەی شیعە کە داوا دەکەن هەڵبژاردنی سەرۆککۆمار و سەرۆکوەزیرانی نوێی عێراق بخرێتە دوای کۆتاییهاتنی جەنگی ئەمریکا و ئیسرائیل لەگەڵ ئێران و رایگەیاند "ئێران خۆی کە لە نێو جەرگەی شەڕدایە، چاوەڕێی نەکرد و رێبەری نوێی کۆماری ئیسلامیی ئێرانی هەڵبژارد، بۆچی دەبێت عێراق چاوەڕێی کۆتاییهاتنی شەڕ بکات؟".
لە چوارچێوەی چالاکییە ساڵانەی (دیوانی بەغدا) کە لەلایەن رەوتی حیکمەی نیشتمانیی بۆ دەستەبژێری سیاسی، حکومی و کۆمەڵایەتی عێراق سازدەکرێت، رۆژی شەممە ٤ی نیسانی 2026 دیداری ئەم ساڵ لەژێر ناونیشانی (جەنگی ناوچەیی و رەنگدانەوەی بۆ سەر عێراق) بەڕێوەچوو.
ئێمە وەک نوێنەری تۆڕی میدیایی رووداو سەبارەت کات و چۆنیەتی یەکلاییکردنەوەی هەڵبژاردنی سەرۆککۆمار و سەرۆکوەزیرانی نوێی عێراق ، پرسیاری خۆمان تۆمارکرد بۆ عەممار حەکیم، سەرۆکی رەوتی نیشتیمانیی حیکمە .
عەممار حەکیم، لە (دیوانی بەغدا) دا رایگەیاند: "ئێمە داوامان لە لایەنە کوردییەکان کردووە لەسەر یەک بەربژێری هاوبەش بۆ پۆستی سەرۆککۆمار رێکبکەون. ئەگەر رێکنەکەوتن، دەتوانن بە دوو بەربژێر بێنە نێو پەرلەمان و کێ زۆرینەی دەنگەکانی هێنا، ئەو دەبێتە سەرۆککۆمار". هەروەها رایگەیاند کە ئەوان لە (چوارچێوەی هاوئاهەنگی)دا رێککەوتوون کە پەرلەمانتارەکانیان ئازادبن لە دەنگدان بە هەر بەربژێرێک و ناچار نەکرێن بە دەنگدان بە بەربژێرێکی دیاریکراو بۆ پۆستی سەرۆککۆمار .
هەروەک بەرپرسانی پارتی دیموکراتی کوردستان و یەکێتی نیشتیمانیی کوردستان لە چەند رۆژی رابردوودا بە تۆڕی میدیایی رووداویان راگەیاند، هەردوولایان لەسەر بەربژێری هاوبەش رێکنەکەوتوون و ئێستا هیچ دانوستاندنێكیان لەوبارەوە لەنێواندا نییە.
هەروەها سەرۆکی رەوتی حیکمە لەبارەی هێرشەکانی سەر هەرێمی کوردستان و بە ئامانجگرتنی ماڵی سەرۆکی هەرێمی کوردستان، سەربازگەی پێشمەرگە و شوێنی کار و ماڵی هاووڵاتیانی سیڤیل نیگەرانی خۆی نیشاندا و بە ئەوانەی بە "کاری نادروست" دانان .
تائێستا بە 651 درۆن و مووشەک لەلایەن کۆماری ئیسلامیی ئێران و گرووپە عێراقییە چەکدارەکانی نزیک لە ئێران هێرشکراوەتە سەر هەرێمی کوردستان .
عەممار حەکیم، کە وەک سەرۆکی (هاوپەیمانی هێزە نیشتمانییەکانی دەوڵەت) بەشداری لە هەڵبژاردنی پەرلەمانی عێراق دا کرد و 18 کورسی بەدەستهێنا. ئەو ئێستا لەگەڵ ئەو سەرکردە شیعانەی نێو (چوارچێوەی هاوئاهەنگی) هاوڕا نییە کە دەڵێن دەبێ هەڵبژاردنی سەرۆککۆمار و سەرۆکوەزیرانی تازەی عێراق دوابخرێت بۆ دوای کۆتاییهاتنی جەنگی ئەمریکا و ئیسرائیل لەگەڵ ئێران. لەوبارەوە گوتی "پێم سەیرە ئێران خۆی کە لە نێو جەرگەی شەڕدایە، چاوەڕێی نەکرد و رێبەری نوێی کۆماری ئیسلامیی ئێرانی هەڵبژارد، بۆچی دەبێت عێراق چاوەڕێی کۆتاییهاتنی شەڕ بکات؟ پەلەکردن لە تەواوکردنی شایستە دەستوورییەکان ئەرکێکی نیشتمانییە و نابێت دوابخرێت".
سەرۆکی رەوتی حیکمە هۆشداریدا لەوەی عێراق بەهۆی هەندێک هێرشی نادروست بۆ سەر نێردە دیپلۆماسییەکان و وڵاتانی دراوسێ، خەریکە رووبەڕووی "گۆشەگیری" دەبێتەوە. وەک نموونە ئاماژەی بە دوورخستنەوەی عێراق لە کۆبوونەوەی مۆسکۆ کرد کە لەنێوان رووسیا و نوێنەرانی وڵاتانی کەنداو و ئوردن لە مانگی رابردوودا لە مۆسکۆ بەڕێوەچوو، بەبێ بەشداریکردنی عێراق.
عەممار حەکیم جەختی لەوە کردەوە کە پشتگیریکردنی ئێران پێویستییەکی نیشتمانییە، بەڵام دەبێت بە شێوازە سیاسی و مرۆیی و میدیاییەکان بێت، نەک بە لێدانی بەرژەوەندییەکانی عێراق یان بەکارهێنانی خاکی عێراق بۆ هێرشکردنە سەر دراوسێیەکان، چونکە پاراستنی سەروەری عێراق لە سەرووی هەموو شتێکەوەیە.
(دیداری بەغدا) بەو ئاراستەیە کۆتاییهات کە عێراق پێویستی بە بڕیارێکی سەربەخۆیە و پێویستی بە هاوسەنگییە لە پەیوەندییەکانیدا. عەممار حەکیم جەختی لەسەر ئەوە کرد کە "جەنگ و ئاشتی" بڕیاری لایەنێکی سیاسی نین و عێراق دەبێت وەک ناوەندێکی لێکتێگەیشتن بمێنێتەوە، نەک ببێتە سووتەمەنی جەنگە ناوچەییەکان.