رووداو دیجیتاڵ
دەستەی دەستپاکیی فیدراڵیی عێراق دەڵێ، زیاتر لە 14 هەزار بەرپرس لە مانگێکدا فۆرمی ئاشکراکردنی داراییان پڕکردووەتەوە، پڕۆسەکەش بۆ پلەی بەڕێوەبەری گشتی و بەرەو سەرەوە ناچارییە.
دەستەکە رۆژی شەممە، 9ـی ئایاری 2026، لە راگەیێندراوێکدا رایگەیاند، لە مانگی نیساندا 14 هەزار و 387 بەرپرس سەروەت و سامانی خۆیان ئاشکرا کردووە.
لە بەشێکی دیکەی راگەیێندراوەکەدا هاتووە، تیمەکانی دەستەی دەستپاکی بۆ دڵنیابوونەوە لە دروستیی ئەو زانیارییانەی لە فۆرمەکاندا تۆمارکراون، 87 سەردانی مەیدانییان بۆ دامەزراوە جیاوازەکانی دەوڵەت ئەنجامداوە و وردکاریی دارایی بەرپرسانیان پشکنیوە.
لەو بارەیەوە عەلی محەممەد، بەڕێوەبەری راگەیاندن و پەیوەندییەکانی دەستەی دەستپاکیی عێراق، ئەمڕۆ شەممە بە رووداوی راگەیاند: "بەپێی یاسای هەموارکراوی دەستەی دەستپاکی، ئاشکراکردنی سەروەت و سامان بۆ سەرجەم بەرپرسانی دەوڵەت لە هەردوو کەرتی شارستانی و سەربازی دەبێتە ناچاری، ئەمەش لە چوارچێوەی هەوڵەکانە بۆ رووبەڕووبوونەوەی گەندەڵی.
بابەتی پەیوەندیدار
"
عەلی محەممەد راشیگەیاند: "بەپێی یاسا، سەرجەم ئەو بەرپرسانەی پلەکەیان لە بەڕێوەبەری گشتی و بەرەو سەرەوەیە، چ لە دامەزراوە شارستانییەکان و چ لە هێزە سەربازییەکان، پابەند دەکرێن بە ئاشکراکردنی سەروەت و سامانی خۆیان."
سەبارەت بە شێوازی پڕکردنەوەی زانیارییەکان، بەڕێوەبەری راگەیاندن و پەیوەندییەکانی دەستەی دەستپاکی دەڵێت: "پڕۆسەی ئاشکراکردنی دارایی لە رێگەی فۆرمێکی تایبەتەوە دەبێت کە لە 9 لاپەڕە پێکهاتووە. بەرپرسان دەبێت لە کاتی وەرگرتنی پۆستەکانیاندا ئەو فۆرمە پڕبکەنەوە و رادەستی لایەنە پەیوەندیدارەکانی بکەن."
عەلی محەممەد ئاماژەی بەوەش کرد، تەنیا پڕکردنەوەی فۆرمی سەرەتایی بەس نییە، بەڵکو فۆرمێکی دیکە هەیە بەناوی (فۆرمی گۆڕانکارییە ساڵانەکان) و ئەم فۆرمە بۆ ئەوەیە بەرپرسان ساڵانە هەر گۆڕانکارییەک لە دارایی و موڵک و ماڵیاندا رووی دا، تۆماری بکەن بۆ ئەوەی چاودێری وردی داراییان بکرێ.
حکومەتی عێراق دەڵێ، مەبەست لەم رێکارانە پاراستنی سامانی گشتی و دڵنیابوونەوەیە لەوەی بەرپرسان پۆستەکانیان بۆ بەرژەوەندیی تایبەت و دەوڵەمەندبوونی نایاسایی بەکارناهێنن.