رووداو دیجیتاڵ
لە مانگی ئاداردا هەناردەی نەوتی عێراق بۆ 18.6 ملیۆن بەرمیل نەوت کەمبووەتەوە کە 1.2 ملیۆن بەرمیلی نەوتی هەرێمی کوردستان بووە و داهاتی نەوتەکەش نزیکەی 69% کەمیکردووە.
رۆژی دووشەممە، 13ی نیسانی 2026، کۆمپانیای بەبازاڕکردنی نەوتی عێراق (سۆمۆ) ئاماری هەناردەی نەوتی بۆ مانگی ئادار بڵاوکردەوە و بەگوێرەی ئامارەکە، لە مانگی ئاداردا کۆمپانیای سۆمۆ 18 ملیۆن و 604 هەزار و 951 بەرمیل نەوتى هەناردەکردووە.
لەو بڕە نەوتەی هەناردەکراوە، 14 ملیۆن و 561 هەزار و 534 بەرمیلی لە کێڵگەکانی نێوەڕاست و باشووری عێراقەوە بووە، بڕی یەک ملیۆن و 271 هەزار و 200 بەرمیلی نەوتی هەرێمی کوردستان بووە، هەروەها بڕی دوو ملیۆن و 772 هەزار و 217 بەرمیلی نەوتی کەرکووکیش لەڕێگەی بەندەری جەیهانی تورکیاوە هەناردەکراوە.
بابەتی پەیوەندیدار
داهاتی ئەو نەوتەی لە مانگی ئاداردا هەناردەکراوە، یەک ملیار و 957 ملیۆن و 212 هەزار دۆلار بووە.
هەناردەی نەوتی عێراق بەراورد بە مانگی شوباتی رابردوو کەمی کردووە، بەوپێیەی لە 28ی شوباتەوە جەنگی ئەمریکا و ئیسرائیل لەگەڵ ئێران دەستیپێکرد و تەنگەی هورمز داخرا کە رێڕۆی هەناردەی زیاتر لە 80%ی نەوتی عێراق بوو.
بەراورد بە مانگی شوبات، هەناردەی نەوتی عێراق لە مانگی ئاداردا نزیکەی 82% کەمی کردووە، هەناردەی نەوتی هەرێمی کوردستانیش نزیکەی 79% کەمیکردووە.
داهاتی نەوتی هەناردەکراوی عێراق و هەرێمی کوردستان لە مانگی ئادار بەراورد بە مانگی پێش خۆی نزیکەی 69% کەمیکردووە.