رووداو دیجیتاڵ
سەرۆکی پارتی بزووتنەوەی نەتەوەیی (مەهەپە)، پێشنیازی دامەزراندنی "ئەنجوومەنی ئاشتیی جیهان" دەکات و دەڵێ، تورکیا دەتوانێت میوانداریی ئەو میکانیزمە بکات کە ئەمریکا، رووسیا، چین، تورکیا و یەکێتیی ئەورووپای تێیدا بەشدار دەبن.
دەوڵەت باخچەلی، شەوی یەکشەممە 12ـی نیسانی 2026، لە پەیامێکی نووسراودا کە بۆ پەخشی راستەوخۆی کەناڵێكی تەلەڤیزیۆنیی وڵاتەکەی نارد، داوای دامەزراندنی "ئەنجوومەنی ئاشتیی جیهان"ـی کرد.
باخچەلی، لە پەیامەکەیدا ئاماژەی بە پێشهاتە نێودەوڵەتییەکان کرد و رایگەیاند، بێ ئەنجامی دانوستاندنەکانی نێوان ئێران و ئەمریکا لە ئیسلامئابادی پایتەختی پاکستان، وێنەیەکی نەرێنی بۆ ئاشتیی جیهان دروستکردووە.
بابەتی پەیوەندیدار
باسی لەوەش کرد، پێشهاتەکان بوونەتە هۆی ئەوەی سیناریۆکانی جەنگی جیهانیی سێیەم بە دەنگێکی بەرزتر باسیان لێوە بکرێت و رایگەیاند، ئەم قۆناخە پێویستی بە میکانیزمێکی نوێی نێودەوڵەتییە.
سەرۆکی مەهەپە رایگەیاند، "لەم هەلومەرجەدا، بە بانگهێشتی ئەنتۆنیۆ گوتێرێز، سکرتێری گشتیی نەتەوە یەکگرتووەکان؛ ئێمە پێشنیاز دەکەین کە ئەمریکا، رووسیا، چین، تورکیا و یەکێتیی ئەوروپا لەرێگەی میکانیزمی 'ئەنجوومەنی ئاشتیی جیهان'ەوە رێوشوێنێکی نوێ پەرەپێبدەن. پێمانوایە تورکیا دەتوانێت میوانداریی ئەم دەستپێشخەرییەش بکات".