رووداو دیجیتاڵ
کۆمپانیای ئاسەلسانی تورکی، سیستەمێکی نوێی بەرگریی دژە درۆنی نمایش کرد.
سیستەمەکە بە ناوی "کۆرکوت 100 – 25 ئێس بی"یە، بۆ بەرەنگاربوونەوەی درۆنی بچووکە کە یەکێک لە هەڕەشە ترسناکەکان لە گۆڕەپانی جەنگیی مۆدێرندا.
سیستەمەکە، بە ژیریی دەستکرد پاڵپشتیکراوە فیشەکی جۆری ئەتۆم-25 بەکاردەهێنێت. بە پێچەوانەی تەقەمەنییە ئاساییەکان، پێویستی بە 'لێدانی ڕاستەوخۆ' نابێت، ئەو جۆرە فیشەکە لە کاتی تەقینەوەی لە نزیک ئامانجەکە، دەبێتە چەند پارچەیەک و توانای پێکانی ئامانجەکەی زیاترە.
بابەتی پەیوەندیدار
بەپێی راگەیێندراوی کۆمپانیاکە، ئەو جۆرە فیشەکە کاریگەری زیاترە و تێچووی دروستکردنیشی کەمترە.
سیستەمەکە دەتواندرێت لە دوورەوە کۆنترۆڵ بکرێت، لە رووی چالاککردن، ئاراستەکردن و بەرپەرچدانەوە. کۆمپانیاکە رایگەیاند سیستەمەکە دەتوانێت لە یەک کاتدا بەرپەرچی چەند ئامانجێک بداتەوە، بە ئەنجامێکی باشتر و تێچووێکی کەمتر.
ئاسەلسان رایگەیاند کە تاقیکردنەوەی سیستەمەکە سەرکەوتوویی کۆتایی هاتووە و بریار وایە بەم زووانە بخریتە پاڵ سیستەمی بەرگری ئاسمانی سوپای تورکیا.
کۆمپانیای ئاسەلسان گەورەترین کۆمپانیای ئەلیکترۆنی و تەکنەلۆژیای بەرگریی تورکیایە.