رووداو - تەندروستی
کەشتیی MV Hondius درێژییەکەی 107.6 مەتر و پانییەکەی 17.6 مەترە و توانای هەڵگرتنی 170 گەشتیاری لە 80 کابینەدا هەیە، کابینەکان جۆری جیاوازیان هەیە، کەشتییەکە شەش ژووری نووستنی 'Gran suite'ی هەیە، کە رووبەرەکەیان 27 مەتر چوارگۆشەیە، بۆ دوو کەس دەبن و باڵکۆنی تایبەتیان هەیە.
ژوورەکانی 'Gran suite' گرانترین کابینەکانی گەشتەکەن، دوای ئەوان هەشت ژووری گەورە دێن، کە ئەوانیش قەرەوێڵەی دوو کەسییان تێدایە و رووبەرەکەیان لەنێوان 19 بۆ 20 مەتر چوارگۆشەدایە، هەروەها کەشتیی MV Hondius هەشت کابینە و یازدە ژووری نووستنی شاهانەی دوو کەسی، چواردە ژووری دوو کەسی بە پەنجەرەوە و بیست و حەوت ژووری دوو کەسی بە پەنجەرەی خڕەوەی تێدایە.
جگە لەوانە دوو کابینەی سێ کەسی و چوار کابینەی چوار کەسی هەن، کە هەموویان پەنجەرەی خڕیان هەیە و هەرزانترین نرخەکانیان لەسەر کەشتیی MV Hondius هەیە، هەرچەندە کرێی هیچ گەشتێکی دە شەوی لە 7 هەزار یۆرۆ کەمتر نییە.
بابەتی پەیوەندیدار
جگە لە ژوورەکانی نووستن، کەشتییەکە چێشتخانە، باڕ، هۆڵێکی پشوودان، کتێبخانە و هۆڵێکی کۆنفرانسی تێدایە.
بە گوتەی هەمان کۆمپانیا، گەشتیارانی ئەم جۆرە گەشتانە تەمەنیان لەنێوان 45 بۆ 65 ساڵدایە، گەشتیاری سەربەخۆن لە سەرانسەری جیهان و ئارەزووی گەڕان بە ناوچە دوورەدەستەکاندا دەکەن.
هەروەها ئۆش نواید ئاگاداری دەدات کە بۆ بەشداریکردن لە یەکێک لە گەشتەکانی، دەبێت "تەندروستیت باش بێت و بتوانیت رۆژانە بۆ ماوەی چەند کاژێرێک بە پێ بڕۆیت." هەرچەندە دڵنیایی دەدەن کە گەشتەکە پێویستی بە توانای جەستەیی زۆر نییە، بەڵام هۆشداری دەدەن کە بە ناوچە دوورەدەستەکاندا تێدەپەڕێت کە دەستڕاگەیشتن بە خزمەتگوزاریی پزیشکی تێدا نییە، هۆشدارییەکە دەڵێت: "نابێت بەشداری لەم گەشتەدا بکەیت ئەگەر هەر نەخۆشییەکت هەبێت کە ژیانت بخاتە مەترسییەوە یان ئەگەر پێویستیت بە چارەسەری پزیشکی هەبێت."