رووداو دیجیتاڵ
دۆناڵد ترەمپ، سەرۆکی ئەمریکا لە پەیامێکدا بە فەرمی رزگارکردنی دووەم فڕۆکەوانی ئەمریکای لە نێو ئێران راگەیاند و ئۆپەراسیۆنەکەی بە "یەکێک لە بوێرترین ئۆپەراسیۆنەکانی گەڕان و رزگارکردن لە مێژووی ئەمریکا"دا ناو برد.
ترەمپ لە پەیامەکەیدا دەڵێت: "دۆزیمانەوە!". هەروەها باس لەوە دەکات، فڕۆکەوانە رزگارکراوەکە ئەفسەرێکی پلە باڵایە بە پلەی عەقید و ئێستا "سەلامەت و تەندروستە".
سەرۆکی ئەمریکا ئاماژەی بەوە کردووە، ئەم ئەفسەرە "لە چیاکانی ئێران و لەپشت هێڵەکانی دوژمنەوە بووە، لە کاتێکدا هێزەکانی ئێران بەدوایدا دەگەڕان و کاژێر بە کاژێر لێی نزیک دەبوونەوە".
ترەمپ دەڵێت: "ئەو هەرگیز بەتەنیا نەبوو، چونکە فەرماندەی گشتیی هێزە چەکدارەکان [واتە خودی ترەمپ]، وەزیری جەنگ، سەرۆکی دەستەی هاوبەشی سوپاسالارەکان و هاوسەنگەرەکانی 24 کاژێر چاودێریی شوێنەکەیان دەکرد."
ترەمپ هەروەها دەڵێت، بە فەرمانی ئەو، سوپای ئەمریکا "دەیان فڕۆکەی بە کوشندەترین چەکی جیهانەوە" ناردووە بۆ هێنانەوەی.
بابەتی پەیوەندیدار
هەرچەندە فڕۆکەوانەکە بریندار بووە، بەڵام دڵنیایی دا کە "باش دەبێت".
لە بەشێکی پەیامەکەدا، ترەمپ نهێنییەکی درکاندووە و دەڵێت: "ئەم ئۆپەراسیۆنە دەرئاسایە، لە دوای رزگارکردنی سەرکەوتووانەی فڕۆکەوانێکی دیکەی قارەمانمان دێت لە رۆژی رابردوودا، کە پشتڕاستمان نەکردەوە بۆ ئەوەی مەترسی نەخەینە سەر ئۆپەراسیۆنی دووەمی رزگارکردن."
ترەمپ جەختی کردەوە، کە ئەمە یەکەمجارە لە مێژووی سەربازیدا دوو فڕۆکەوانی ئەمریکی بە جیا و لە قووڵایی خاکی دوژمندا رزگار بکرێن.
سەرۆکی ئەمریکا ئاماژەی بەوەش کرد، هەردوو ئۆپەراسیۆنەکە بێ کوژران یان برینداربوونی تەنانەت یەک ئەمریکیش، سەلمێنەری ئەوەیە کە "ئەمریکا کۆنترۆڵی رەها و باڵادەستیی بەسەر ئاسمانی ئێراندا بەدەستهێناوە."
ترەمپ داوای یەکڕیزی لە هەموو ئەمریکییەکان کرد بێ گوێدانە جیاوازییە حیزبییەکان و گوتی: "ئەمە ساتێکە کە دەبێت هەموو ئەمریکییەکان شانازیی پێوە بکەن. ئێمە باشترین و پیشەگەرترین سوپامان لە مێژووی جیهاندا هەیە."