رووداو دیجیتاڵ
کۆمپانیایەکی نوێی تەکنەلۆجیا بە ناوی (Neurable) بیستۆکێکت (هێدفۆن) زیرەکی دروستکردووە، کە کاری تەنیا ئەوە نییە گوێ لە دەنگ و گۆرانی بگریت، بەڵکو دەتوانێت شەپۆلەکانی مێشکیشت بخوێنێتەوە.
لەنێو پادەکانی ئەم هێدفۆنەدا، واتە لەنێو ئەو بەشەی دەکەوێتە سەر گوێیەکانت، چەند هەستەوەرێکی بچووک و شاراوە هەن. ئەم هەستەوەرانە بێ ئەوەی هەستیان پێ بکەیت، چاودێریی چالاکییەکانی مێشکت دەکەن. واتە دەزانن کەی مێشکت زۆر چالاکە و سەرنجی بەهێزە، یان کەی خەیاڵت رۆیشتووە و مێشکت ماندووە.
سوودەکانی ئەم بیستۆکە چین؟
- پێوانەکردنی سەرنج و وریایی: لە رێگەی ئەپڵیکەیشنێکەوە لەسەر مۆبایلەکەت، پێت دەڵێت لە چ کاتێکی رۆژەکەدا لە وریاترین ئاستدایت بۆ ئەوەی کارە قورسەکانت لەو کاتەدا بکەیت.
- رێگریکردن لە شەکەتی: کاتێک هێدفۆنەکە هەست دەکات مێشکت زۆر ماندوو بووە، ئاگادارت دەکاتەوە کە کاتی ئەوەیە پشوویەک بدەیت، بۆ ئەوەی تووشی سەرئێشە و شەکەتی نەبیت
- بێدەنگکردنی بێزارکەرەکان: یەکێک لە تایبەتمەندییە سەرسوڕهێنەرەکانی ئەوەیە، کاتێک دەزانێت تۆ زۆر بە قووڵی چوویتە نێو کارەکەتەوە، دەتوانێت بە شێوەیەکی خۆکارانە زەنگ و نامەی مۆبایلەکەت بێدەنگ بکات بۆ ئەوەی سەرنجت پەرت نەبێت.
بابەتی پەیوەندیدار
بۆچی ئەمە گرنگە؟
پێشتر بۆ خوێندنەوەی شەپۆلەکانی مێشک، دەبووایە بچیتە نەخۆشخانە و ئامێری گەورە و وایەری زۆر بە سەرتەوە ببەسترێن. بەڵام ئێستا ئەم کۆمپانیایە توانیویەتی ئەو تەکنەلۆجیایە بخاتە نێو هێدفۆنێکی ئاساییەوە کە رۆژانە بەکاریدەهێنین، ئەمەش یارمەتیی مرۆڤ دەدات بەرهەمدارتر بێت و باشتر ئاگاداری تەندروستیی مێشکی بێت.