رووداو دیجیتاڵ
بۆ یەکەمجار لە مێژووی ئەمریکادا، ژمارەی ئەو دایکانەی لە تەمەنی 40 ساڵی و بەرەو سەر منداڵیان دەبێت، لە ژمارەی دایکە هەرزەکار و گەنجەکانی ئەو وڵاتە زیاترە. توێژینەوەیەکی نوێ دەریدەخات، ئێستا بوون بە دایک لە تەمەنی چلەکاندا بووەتە دیاردەیەکی ئاسایی و قبووڵکراو.
بەپێی ئامارە نوێیەکانی ناوەندی نیشتمانیی ئاماری تەندروستیی ئەمریکا، گۆڕانکارییەکی گەورە لە تەمەنی دایكایەتیدا روویداوە. لە کاتێکدا پێش چەند دەیەیەک منداڵبوون لە تەمەنی چلەکاندا شتێکی دەگمەن بوو، ئێستا زۆرینەی هاوژینەکان بەهۆی گەشتکردن، کارکردن یان گەیشتن بە سەقامگیریی دەروونی، منداڵبوونیان دواخستووە.
ئامارەکان چیمان پێ دەڵێن؟
توێژینەوەکە کە لە کۆتایی 2025دا کراوە، چەند راستییەکی گرنگ دەخاتەڕوو: لە نێوان ساڵانی 1990 بۆ 2023، ژمارەی کۆرپە لەدایکبووەکان لە ئەمریکا بە رێژەی 14% دابەزیوە. تێکڕای منداڵ بۆ هەر خێزانێک لە 1.66ـەوە بۆ 1.62 دابەزیوە.
رێژەی بەپیتیی ئەو ژنانەی تەمەنیان لە نێوان 35 بۆ 39 ساڵە، 71% زیادی کردووە؛ سەرسوڕهێنەرتر ئەوەیە کە رێژەی بەپیتی تەمەنی 40 بۆ 44 ساڵ و بەرەو سەر، 127% زیادی کردووە.
بابەتی پەیوەندیدار
بۆچی ژنان منداڵبوون دوادەخەن؟
پسپۆڕان باس لەوە دەکەن کە سێ فاکتەری سەرەکی لە پشت گۆڕانی حەزی ژنانن بۆ منداڵبوون لە تەمەنێکی درەنگدا. یەکەمیان پێشکەوتنی تەکنەلۆژیای پزیشکییە وەک "بەستنی هێلکە" و پیتاندنی دەستکرد، کە دەرفەتی "وەستاندنی کات"ی بە ژنان داوە.
هۆکاری دووەم بۆ لایەنی ئابووری دەگەڕێتەوە، کە تێیدا ژنان دەیانەوێت پێش دایکایەتی، پێگەی پیشەیی و دارایی خۆیان جێگیر بکەن.
مەترسی و سوودەکان
کۆلێژی پزیشکانی ئافروتان و منداڵبوونی ئەمریکی (ACOG) ئاماژە بەوە دەکات کە دووگیانی لە دوای 35 ساڵییەوە مەترسییەکانی وەک: شەکرەی دووگیانی، بەرزبوونەوەی پەستانی خوێن، لەبارچوون و کێشەی کرۆمۆسۆمی زیاد دەکات.
بەڵام لە لایەکی دیکەوە، سوودی گرنگیشی هەیە. دکتۆر تامی رۆوین دەڵێت، ئەم دووگیانییانە بە زۆری "پلان بۆ داڕێژراون"، دایکەکان لەو تەمەنەدا خاوەن ئەزموونێکی زۆرترن، ژیانێکی تەندروستتر پەیڕەو دەکەن و کەمتر پەنا بۆ جگەرە و کحول دەبەن. هەروەها هەندێک توێژینەوە ئاماژە بەوە دەکەن کە منداڵبوون لە تەمەنی درەنگدا تەندروستیی مێشک و تەمەندرێژیی دایك باشتر دەکات.