رووداو دیجیتاڵ
ئاژانسی هەواڵی ئەسۆشیەیتد پرێسی ئەمریکی لە زاری چەند بەرپرسێکەوە کە نەیانویستووە ناویان ئاشکرا بکرێت، زانیاریی نوێ لەسەر هەوڵەکانی پشت پەردە بۆ دەستپێکردنەوەی دانوستاندنەکانی نێوان ئەمریکا و ئێران ئاشکرا دەکات.
دوو بەرپرسی پاکستانی بە ئاژانسەکەیان راگەیاندووە: "سەرکردایەتیی باڵای سیاسی و سەربازیی پاکستان پەلە دەکەن و هەوڵێکی زۆر دەدەن بۆ دەستپێکردنەوەی دانوستاندنەکانی نێوان ئەمریکا و ئێران، ئەوەش دوای ئەوەی دۆناڵد ترەمپ، سەرۆکی ئەمریکا گەشتی نێردەکانی بۆ ئیسلام ئاباد هەڵوەشاندەوە.
لەلایەکی دیکەوە، بەرپرسێکی هەرێمی کە راستەوخۆ لە هەوڵەکانی نێوەندگیریدا بەشدارە، 4 خاڵی گرنگی بە ئەسۆشیەیتد پرێس گوتووە:
1- نێوەندگیرەکانی پاکستان سەرقاڵی کارکردنن بۆ نزیککردنەوەی هەڵوێستەکان و چارەسەرکردنی ئەو ناکۆکییە گەورەیانەی لە نێوان ئەمریکا و ئێراندا هەن.
بابەتی پەیوەندیدار
2- ئێران هێشتا سوورە لەسەر ئەوەی دەبێت ئەمریکا کۆتایی بە گەمارۆی سەر بەندەرەکانی ئێران بهێنێت، پێش ئەوەی دەست بە گەڕێکی نوێی دانوستاندن بکەن.
3- گفتوگۆکانی عەباس عێراقچی، وەزیری دەرەوەی ئێران لە مەسقەتی پایتەختی عومان، تیشکیان خستووەتە سەر کێشەکانی تەنگەی هورمز، کە یەکێکە لە گەورەترین ئاڵنگارییەکانی بەردەم دانوستاندن.
4- ئێران دەیەوێت عومان رازی بکات کە پاڵپشتی لە میکانیزمێک بکات بۆ وەرگرتنی باج لەو کەشتییانەی بە گەرووی هورمزدا تێدەپەڕن.