رووداو دیجیتاڵ
ئەحمەد شەرع، سەرۆکی سووریا، زنجیرەیەک مەرسوومی نوێی بۆ ساڵی 2026 دەرکرد و تێیدا چەندین بەرپرسی باڵای لە پۆستە وزاری و کارگێڕییەکاندا دەستنیشان کرد.
بەپێی ئەو مەرسوومانەی کە ئەحمەد شەرع دەریچواندوون، گۆڕانکارییەکان بەم شێوەیەن:
- مەرسوومی ژمارە 98: دەستنیشانکردنی عەبدولڕەحمان بەدرەدین ئەعما وەک ئەمینداری گشتیی سەرۆکایەتیی کۆمار.
- مەرسوومی ژمارە 100: دەستنیشانکردنی خالید فەواز زەعروور وەک وەزیری راگەیاندن.
- مەرسوومی ژمارە 101: دەستنیشانکردنی باسل حافز سوەیدان وەک وەزیری کشتوکاڵ.
- مەرسوومی ژمارە 102: دەستنیشانکردنی غەسان ئیلیاس سەید ئەحمەد وەک پارێزگاری قونەیترە.
- مەرسوومی ژمارە 103: دەستنیشانکردنی مورهەف خالید نەعسان وەک پارێزگاری حومس.
ئەم مەرسوومانە لە چوارچێوەی هەوڵەکانی حکومەتی نوێی سووریادان بۆ رێکخستنەوەی دامەزراوەکانی دەوڵەت و پڕکردنەوەی پۆستە باڵاکان لە قۆناخی راگواستنی وڵاتەکەدا.
بابەتی پەیوەندیدار
ئەحمەد شەرع، کە پێشتر بە (ئەبو محەممەد جۆلانی) دەناسرا و سەرکردایەتیی گرووپی "دەستەی تەحریری شام"ی دەکرد، لەدوای رووخانی رژێمی بەشار ئەسەد لە کۆتایی ساڵی 2024ـدا، وەک کارەکتەری سەرەکیی قۆناخی راگوزەری سووریا دەرکەوت.
حکومەتەکەی ئەحمەد شەرع ئێستا لە قۆناخی بنیاتنانەوەی دامەزراوەکانی دەوڵەتدایە و دەیەوێت لە رێگەی دەستنیشانکردنی کەسایەتیی نوێ بۆ پۆستە وزاری و کارگێڕییەکان، سەقامگیریی سیاسی و ئەمنی بۆ سووریا بگێڕێتەوە.
ئەم مەرسوومانەی ئەم دواییە بۆ دەستنیشانکردنی وەزیری راگەیاندن، کشتوکاڵ و پارێزگارەکان، وەک هەنگاوێک دەبینرێن بۆ سەپاندنی دەسەڵاتی دەوڵەت و رێکخستنەوەی کاروباری پارێزگاکانی وەک حومس و قونەیترە کە پێشتر ململانێی تووندیان تێدا بووە.
ئەم حکومەتە لە ژێر چاودێرییەکی وردی نێودەوڵەتیدایە و رووبەڕووی ئاڵنگارییەکی گەورەی ئابووری، مرۆیی و ئەمنی بووەتەوە.