.jpg&w=3840&q=75)
رووداو دیجیتاڵ
بەرپرسێکی چوارچێوەی هاوئاهەنگیی شیعەکان رایگەیاند، بیرۆکەی دروستکردنی "هاوپەیمانیی بەهێزەکان" وەک پڕۆژەیەکی "بە مردوویی لەدایکبوو" کۆتاییهات و دروست ناکرێت، ئەوەش لەپێناو پاراستنی یەکڕیزیی نێو چوارچێوەکە.
ئەمڕۆ یەکشەممە، 24-05-2026، ئەبو میساق مەساری، ئەندامی مەکتەبی سیاسیی رێکخراوی بەدر بە سەرۆکایەتیی هادی عامری، بە تۆڕی میدیایی رووداوی راگەیاند: "راستە پێشتر بیرۆکەی دروستکردنی هاوپەیمانیی بەهێزەکان لەنێو چوارچێوەی هاوئاهەنگیدا هەبوو، بەڵام پێش ئەوەی لەدایک ببێت، مرد."
سەبارەت بە هۆکاری پاشەکشەکردن لەو بیرۆکەیە، مەساری گوتی، هەندێک لە سەرکردەکان پێیانوابوو دروستکردنی ئەو هاوپەیمانییە دەبێتە هۆی جیابوونەوەی زیاتر لە نیوەی چوارچێوەی هاوئاهەنگی و لە ئەنجامدا "دوو چوارچێوە" دروست دەبن.
ئەو بەرپرسەی رێکخراوی بەدر گوتیشی: "لەبەرئەوەی ئەو بیرۆکەیە دەبووە هۆی دابەشبوونی چوارچێوەکە، بۆیە وازی لێهێنرا."
هاوپەیمانییەکە، بڕیار بوو لە دەوڵەتی یاسا ( نووری مالیکی)، رێکخراوی بەدر (هادی عامری)، ئەبشیر یاعێراق ( هومام حموودی)، عەقدی نیشتمانی (فالح فەییاز) و بزووتنەوەی سۆمەریون ( ئەحمەد ئەسەدی) و هاوپەیمانی ئەساسی عێراقی ( موحسین مەندەلاوی) و چەند هێزێکی دیکە پێکبێت. لە بەرامبەردا هاوپەیمانییە رانەگەیێندراوەکەی هاوپەیمانیی ئاوەدانکردنەوە و گەشەپێدانی محەممەد شیاع سوودانی، رەوتی حیکمەی نیشتمانیی عەمار حەکیم و سادیقوونی قەیس خەزعەلی و پارتی تەقەدووم( محەممەد حەلبووسی) و یەکێتیی نیشیتمانیی کوردستان ( بافل تاڵەبانی).