رووداو دیجیتاڵ
چوار گەنج لە شاری سلێمانی گرووپێکیان بەناوی "دەستی چاکسازی" پێکهێناوە و ئەرکی نۆژەنکردنەوەی شەقام و رێگە سەرەکییەکانیان گرتووەتە ئەستۆ؛ ئەوان دەڵێن بەبێ بەرژەوەندیی ماددی و تەنیا بۆ پاراستنی ژیانی شۆفێران ئەو کارە دەکەن و داوای هاوکاری دەکەن بۆ ئەوەی پڕۆژەکەیان رانەوەستێت.
راستی جەلال، ئەندامی گرووپی "دەستی چاکسازی" بە رادیۆی رووداوی راگەیاند: "ئێمە وەک چوار گەنج، بەبێ هیچ بەرژەوەندییەکی ماددی و بە شێوەیەکی خۆبەخشانە، بڕیارمان دا هاوکاری حکومەت و خەڵک بین بۆ پڕکردنەوەی چاڵ و تاسەی سەر شەقامەکان، بەتایبەت ئەو رێگایانەی نێوان شارەکان کە مەترسییان بۆ سەر ژیانی شۆفێران دروست کردووە."
بەکارهێنانی 120 کیسە قیڕ لەسەر ئەرکی خێرخوازان
بە گوتەی ئەو ئەندامەی گرووپەکە، لە ماوەی رابردوودا توانیویانە نزیکەی 120 کیسە قیڕی سارد لە چاککردنەوەی شەقامەکاندا بەکاربهێنن. کە هەر کیسەیەک قیڕ لە نێوان 35 بۆ 40 دۆلاردایە و تاوەکو ئێستا تێچووەکەی لەلایەن خەڵکی خێرخواز و خاوەنکارانەوە بۆیان دابین کراوە.