رووداو دیجیتاڵ
دۆناڵد ترەمپ، سەرۆکی ئەمریکا رایگەیاندووە، ئێران لە دۆخێکی زۆر خراپدایە و بەمزووانە "تەواوی ژێرخانە نەوتییەکەی دەتەقێتەوە"، ئەوەش لەبەر ئەوەی بەهۆی ئەو گەمارۆیەی ئەمریکا بەسەر بەندەرەکانیدا سەپاندووە، چیدیکە ناتوانێت نەوتەکەی دەربهێنێت و هەناردەی بکات. بەڵام رۆژنامەی واشنتن پۆست بە گەڕانەوە بۆ قسەی شارەزایانی بواری وزە، دەڵێت قسەکانی ترەمپ دوورن لە راستییەوە.
ترەمپ چی دەڵێت؟
ترەمپ دەڵێت، لەبەرئەوەی ئەمریکا رێگەی لە ئێران گرتووە نەوتەکەی لە رێگەی تەنگەی هورمزەوە بفرۆشێت، نەوتەکە لەنێو بۆری و کۆگاکاندا کەڵەکە بووە و پەستانێکی زۆری دروستکردووە.
ئەو پێیوایە ئەگەر ئێران بە خێرایی دەست بە هەناردەکردنەوەی نەکات، هەموو شتێک "لەنێوەوە دەتەقێتەوە" و زیانێکی وا گەورەی بەردەکەوێت کە چیدیکە ناتوانێت چاکی بکاتەوە.
واشنتن پۆست دەڵێت، ترەمپ ئەم قسەیە دەکات بۆ ئەوەی گوشار لە ئێران بکات تاوەکو بێتە سەر مێزی دانوستاندن.
شارەزایان چی دەڵێن؟
زۆربەی شارەزایانی بواری وزە کە قسەیان بۆ رۆژنامە ئەمریکییەکە کردووە، دەڵێن، "ئەمە شتێکی ئەستەمە" و "کارەکان بەو شێوەیە نابن.
بابەتی پەیوەندیدار
"
- ئێران کاتی هەیە: دەڵێن ئێران هێشتا چەندین هەفتە و بگرە چەند مانگێکیشی ماوە تاوەکو هەموو کۆگاکانی پڕ ببن. دەتوانێت نەوتەکەی لەنێو کەشتییە نەوتهەڵگرەکانیشیدا کۆبکاتەوە.
- تەقینەوە روونادات: ئەگەر کۆگاکانیشی پڕ ببن، ئەوەی روودەدات تەقینەوە نییە، بەڵکو ناچار دەبێت بەرهەمهێنان رابگرێت. راگرتنی بەرهەمهێنان لەوانەیە زیانی درێژخایەنی هەبێت، بەڵام نابێتە هۆی تەقینەوە.
کاردانەوەی ئێران
محەممەدباقر قالیباف، سەرۆکی پەرلەمانی ئێران گاڵتەی بە قسەکانی ترەمپ کردووە و لە تۆڕی کۆمەڵایەتیی ئێکس نووسیویەتی: "سێ رۆژ تێپەڕی و هیچ بیرە نەوتێک نەتەقییەوە. دەتوانین بۆ 30 رۆژی دیکەش درێژی بکەینەوە و راستەوخۆ پەخشی بکەین."
کێشەکە چییە؟
کێشەی سەرەکی ئەوەیە کە داخستنی تەنگەی هورمز بووەتە هۆی بەرزبوونەوەی نرخی نەوت و بەنزین لە هەموو جیهاندا. ئەمەش وایکردووە خەڵک لە ئەمریکا و وڵاتانی دیکە بێزار بن لە پێدانی پارەی زیاتر بۆ سووتەمەنی و پێداویستییەکانی دیکە.