رووداو دیجیتاڵ
ئەیوب کاراهان، شاعیر و جووتیارێکی گوندی مەشقۆکی سەر بە قۆسەری مێردینی باکووری کوردستانە، شیعرە کوردییەکانی بە یارمەتیی ژیریی دەستکرد دەکاتە گۆرانی و لە تۆڕە کۆمەڵایەتییەکاندا بڵاویان دەکاتەوە. ئەو دەڵێت، "من شیعرەکان دەنووسم، ئەوەی دیکە هەمووی ژیریی دەستکرد بۆم ئامادە دەکات و بەرهەمێکی جوانی کوردی دێتە کایەوە".
ئەیوب کاراهان دوای تەواوکردنی کاری رۆژانەی کشتوکاڵی، قەڵەم و دەفتەرەکەی هەڵدەگرێت و هەستەکانی لە رێگەی شیعری کوردییەوە دەردەبڕێت، لەبری ئەوەی شیعرەکانی لە کتێبێکدا چاپ بکات، رێگەیەکی نوێی دۆزیوەتەوە؛ بە یارمەتیی ژیریی دەستکرد و شیعرەکانی دەکاتە گۆرانی، سیناریۆ بۆ ئامادە دەکات و دەیانکاتە کلیپ و لە تۆڕە کۆمەڵایەتییەکاندا بڵاویان دەکاتەوە.
ئەیوب کاراهان لەبارەی سەرەتای پڕۆژەکەیەوە بە تۆڕی میدیایی رووداوی راگەیاند: "ماوەیەکی زۆرە شیعر دەنووسم. دەمویست ئەم شیعرانەم لەلایەن هونەرمەندانەوە بگوترێنەوە، بەڵام گەیشتن بە هونەرمەندان کارێکی سەخت بوو".
کاراهان گوتیشی: "دروستکردنی کلیپ قورس بوو. لەبەرئەوەی لە رووی داراییەوە ئاسانترە، منیش گوتم بە ئەپلیکەیشنەکانی ژیریی دەستکرد ئەم کارە دەکەم. شیعرەکانم دەخەمە ئەپی (Suno)، ئەو شێوازە میوزیکەی دەمەوێت دەینووسم و ئەویش گۆرانییەکم بۆ بەرهەم دێنێت.
بابەتی پەیوەندیدار
کولتوور 23/04/2026
مەروان داود کۆمەڵە چیرۆکی (کەزی) بڵاودەکاتەوە
کولتوور 22/04/2026
بەڵگەفیلمێکی کوردی لە ئەمریکا خەڵاتێکی گەورە دەباتەوە
بەم شێوەیە، بە گشتی لە ماوەی سێ کاژێردا دەتوانین ببینە خاوەنی گۆرانی و کلیپێک".
کاراهان ئاماژەی بە یەکێک لە شیعرەکانی کرد و گوتی: "یەکێک لەو شیعرانەی نووسیبووم، دەنگی ناقوسی کەنیسەکان بە شاردا بڵاو دەبێتەوە، دەبیسترا. دەمویست (سیا شەڤێ) بیڵێتەوە، بەڵام بووە قسمەتی ژیریی دەستکرد".
لە پڕۆژەکەدا، حەسەن گەرۆکی برای ئەیوبیش بەشدارە و کاری دەرهێنان بۆ ئەو کلیپانە دەکات کە بە ژیریی دەستکرد دروست دەکرێن.
هەردوو برا شانبەشانی یەکدی کار دەکەن و بە بەکارهێنانی تەکنەلۆژیا، گۆرانیی کوردی بە هەموو شێوازە جیاوازەکانی میوزیک بەرهەم دێنن و ئەرشیڤی میوزیکی سەردەمی نوێی کوردی دەوڵەمەندتر دەکەن.
حەسەن گەرۆک دەرهێنەرە و گوتی: "دەمانەوێت لە رێگەی ئەم کارەوە، کولتوور و هونەری ئێمە لەسەر ژیریی دەستکردیش بناسرێت و بڵاوببێتەوە و جێگەی خۆی بگرێت".
ئەیوب و حەسەن جەخت لەوە دەکەنەوە، تاوەکو توانایان هەبێت لەسەر ئەم کارە بەردەوام دەبن و لە رێگەی ژیریی دەستکردەوە میوزیکێکی ئاست بەرز پێشکێشی کورد دەکەن.