رووداو دیجیتاڵ
رزگارکردنی فڕۆکەوانە ئەمریکییەکە لە ناو جەرگەی چیاکانی ئێران دوای 36 کاژێر خۆشاردنەوە، پەردەی لە سەر جۆرە راهێنانێکی یەکجار قورس و ئاڵۆز لادا کە فڕۆکەوان و هێزە تایبەتەکانی ئەمریکا پێش کردنی هەر ئەرکێکی جەنگی دەیبینن. ئەم مەشقە بە (SERE) دەناسرێت.
پڕۆگرامی (SERE) چییە؟
ئەم دەستەواژەیە کورتکراوەی چوار وشەی سەرەکییە: (Survival) مانەوە لە ژیان، (Evasion) خۆدزینەوە، (Resistance) بەرگری و (Escape) هەڵاتن. ئامانجی ئەم مەشقە ئەوەیە، سەربازەکە دوای کەوتنەخوارەوەی فڕۆکەکەی، بتوانێت "بە سەربەرزییەوە بگەڕێتەوە نیشتمان."
جەنەڕاڵ دەیڤد دیپتۆلا، فەرماندەی پێشووی هێزی ئاسمانی قسەی بۆ رۆژنامەی وۆڵ ستریت جۆرناڵ کرد و گوتی: "ئەم مەشقە بۆ ئەوەیە فڕۆکەوانەکە ئامادە بێت بە تەنیا لە ناو خاکی دوژمندا بمێنێتەوە، رێگری لە دەستگیرکردنی بکات، ئەگەر گیراش، بەرگری لە بەرامبەر لێکۆڵینەوە و چەوساندنەوەدا بکات."
چوار کۆڵەکەی مانەوە لە ناو جەرگەی جەنگدا
یەکەم: مانەوە لە ژیان (Survive)
کاتێک فڕۆکەوانێک بە پەڕەشووت باز دەدات، رووبەڕووی شۆکێکی جەستەیی و دەروونیی گەورە دەبێتەوە. مەشقی (SERE) فێریان دەکات چۆن گوشارەکانیان کۆنتڕۆڵ بکەن و وزەی جەستەیان بپارێزن.
خۆراک و ئاو: فێر دەبن چۆن لە بیابان و جەنگەڵ و ناوچە بەستەڵەکەکاندا ئاو بدۆزنەوە، بە دار و چیلکە ئاگر بکەنەوە و "مێروو، سیسرک و رووەکی کاکتەس" بخۆن بۆ ئەوەی لە برسان نەمرن.
دووەم: خۆدزینەوە (Evade)
ئامانجی سەرەکی ئەوەیە سەربازەکە دەستگیر نەکرێت.
بابەتی پەیوەندیدار
هەر گەشتێکی ئاسمانی پلانێکی پێشوەختەی بۆ "رزگارکردن" هەیە. فڕۆکەوانەکە دەبێت بەردەوام لە جووڵەدا بێت و خۆی حەشار بدات تاوەکو دەگاتە خاڵی رزگارکردن.
نموونەی مێژوویی: کاپتن سکۆت ئۆگرادی لە ساڵی 1995 لە جەنگی بۆسنەدا، 6 رۆژ لە ناو خاکی دووژمن مابووەوە و لەرێگەی خواردنی "مێروولە" و جووڵەی شەوانەوە توانی رزگاری بێت.
سێیەم: بەرگری (Resist)
ئەگەر سەربازەکە لە لایەن دووژمنەوە بینرا، دەبێت بەرگری بکات. ئەم بەشەی مەشقەکە زۆر نهێنییە، بەڵام زانیارییەکان ئاماژە بەوە دەکەن کە فڕۆکەوانەکان مەشقی هونەرە بەرگرییەکان دەبینن و فێری رێساکانی "رێککەوتننامەی جنێڤ" دەبن. بەپێی فەرمانی دوایت ئایزنهاوەر، سەرۆکی پێشووتری ئەمریکا، سەربازی دیل تەنیا بۆی هەیە "ناو، پلە، رۆژی لەدایکبوون و ژمارەی سەربازییەکەی" بە دووژمن بڵێت.
چوارەم: هەڵاتن (Escape)
ئامانجی کۆتایی گەڕانەوەیە بۆ ماڵەوە. فڕۆکەوانەکان فێر دەبن چۆن ئامێرەکانی وەک رادیۆ، جی پی ئێس (GPS) و ئاماژە رۆشناییەکان بەکاربهێنن تاوەکو تیمی رزگارکردن شوێنە وردەکەیان بدۆزنەوە.
بنکەی سەرەکیی مەشقەکان
ناوەندی سەرەکیی ئەم مەشقە مەترسیدارانە لە بنکەی ئاسمانیی فەیرچایڵدە لە ویلایەتی واشنتن. مایکڵ سالڤاجیۆ، یەکێک لە راهێنەرەکان دەڵێ: "ئێمە هەموو ئامرازێکیان دەدەینێ تاوەکو لە دووژمن رابکەن و بە سەلامەتی بگەڕێنەوە."
ئەو فڕۆکەوانە ئەمریکییەی ئەم هەفتەیە لە ئێران رزگار کرا، بە سەختی بریندار بوو، بەڵام بەهۆی ئەم مەشقە تووندانەوە توانی لە ناوچەیەکی دوورەدەست و شاخاوی بۆ ماوەی 36 کاژێر لە دەست هێزە ئێرانییەکان رابکات کە بە چڕی بە دواییدا دەگەڕان.