رووداو دیجیتاڵ
کۆنسووڵی گشتیی چین لە هەولێر وردەکاریی دوو لووتکەی وڵاتەکەی لەگەڵ سەرۆکانی ئەمریکا و رووسیا دەخاتەروو؛ رایدەگەیێنێت پەکین کار بۆ جیهانێکی فرەجەمسەر دەکات و داواش لە حکومەتی هەرێمی کوردستان دەکات پابەندی پرەنسیپی "یەک چین" بێت.
لیو جیون، کۆنسووڵی گشتیی چین لە هەولێر لە راگەیێندراوێکدا ئاماژەی بەوە کرد، چین لە رێگەی دیداری لووتکە لەگەڵ واشنتن و مۆسکۆ، هەوڵ دەدات دیدگایەکی نوێ بۆ سەقامگیریی ستراتیژی لە جیهاندا بونیاد بنێت، کە تێیدا دیالۆگ و هاوکاری بنەمای سەرەکی بن.
پەیوەندییەکانی پەکین و واشنتن؛ چوار کۆڵەکەکەی سەقامگیری
رۆژی 13ی ئایاری ئەمساڵ، دۆناڵد ترەمپ، سەرۆکی ئەمریکا بە یاوەری شاندێکی باڵا سەردانی چینی کرد. بەگوێرەی گوتەکانی لیو جیون، لەو لووتکەیەدا هەردوولا لەسەر بونیادنانی "پەیوەندییەکی بنیادنەر بۆ سەقامگیریی ستراتیژی" رێککەوتوون کە لەسەر چوار بنەما دەبێت:
1-سەقامگیریی ئەرێنی: هەردوو وڵات درک بەوە بکەن بەبێ یەکدی گەشە ناکەن.
2-سەقامگیریی دروست: کێبڕکێ نەبێتە یاریی "بردنەوە و دۆڕان".
3-سەقامگیریی بەردەوام: رێزگرتن لە بەڵێن و قسەکان.
4-سەقامگیریی هەمیشەیی: رەتکردنەوەی جەنگ و ململانێ.
کۆنسووڵی چین دەڵێت، سەرۆک شی جینپینگ و ترهمپ رێککەوتوون کە دروشمی "بەهێزکردنی نەتەوەی چین" و "ئەمریکا دووبارە مەزن بکەرەوە" دەتوانن شانبەشانی یەکدی بڕۆن. هەروەها بڕیاردراوە "ئەنجوومەنی بازرگانی" و "ئەنجوومەنی وەبەرهێنان" لەنێوان هەردوو وڵاتدا دابمەزرێت.
پەیامێک بۆ هەرێمی کوردستان
لە راگەیێندراوەکەدا، کۆنسووڵی گشتیی چین تیشکی خستووەتە سەر پرسی تایوان و رایگەیاندووە کە چین ئەمە بە بابەتێکی ناوخۆیی دەبینێت و "سەربەخۆیی تایوان و ئاشتی، وەک ئاگر و ئاو وان".
لیو جیون روو لە بەرپرسان و خەڵکی کوردستان دەڵێت: "هیوادارین حکومەتی هەرێمی کوردستان و خەڵکەکەی لە هەموو چین و توێژەکانەوە، بە تووندی پابەندی پرەنسیپی 'یەک چین' بن و پێکەوە پارێزگاری لە بڕیارنامەی 2758ی کۆمەڵەی گشتیی نەتەوە یەکگرتووەکان بکەن."
دۆخی ناوچەکە و تەنگەی هورمز
سەبارەت بە گرژییەکانی رۆژهەڵاتی ناوەڕاست، چین داوای لە ئەمریکا و ئێران کردووە کێشەکانیان بە دیالۆگ چارەسەر بکەن. پەکین داوای کردنەوەی بەپەلەی "تەنگەی هورمز" دەکات (کە لە 2ی ئازارەوە لەلایەن ئێرانەوە داخراوە) لەسەر بنەمای ئاگربەستێکی گشتگیر.
پەیوەندییەکان لەگەڵ مۆسکۆ؛ ئاستێکی بێوێنە
تەوەرێکی دیکەی راگەیێندراوەکە تایبەت بوو بە لووتکەی نێوان شی جینپینگ و ڤلادیمیر پووتین، سەرۆکی رووسیا لە 19ی ئایار. کۆنسووڵی چین دەڵێت: "پەیوەندییەکان لە ئاستێکی بەرزی بێوێنەدایە."
لەو دیدارەدا 20 بەڵگەنامەی هاوکاری لە بوارەکانی ئابووری، تەکنەلۆژیا و پەروەردە واژۆ کراون. هەردوولا رێککەوتوون پلانە ستراتیژییەکانیان تاوەکو ساڵی 2030 هاوتەریب بکەن و کار بۆ جیهانێکی "فرەجەمسەر" بکەن، کە تێیدا دادپەروەریی نێودەوڵەتی پارێزراو بێت و رێگری لە زیندووکردنەوەی فاشیزم بکرێت.
گوتارەکەی کۆنسووڵی گشتیی چین لە هەرێمی کوردستان:
لووتکەی چین و ئەمریکا
یەکەم، دیدگای نوێ بۆ پەیوەندییەکانی چین و ئەمریکا. گرنگترین لێکتێگەیشتنی سیاسی ئەوەیە کە هەردوو سەرۆک لەسەر دیدگایەکی نوێ بۆ بونیادنانی "پەیوەندییەکی بنیادنەری نێوان چین و ئەمریکا بۆ سەقامگیریی ستراتیژی" رێککەوتن، کە رێنمایی ستراتیژی بۆ پەیوەندییە دووقۆڵییەکان لە ماوەی سێ ساڵی داهاتوو و دواتریش دابین دەکات. چین بەم جۆرە لە رێککەوتنەکە تێدەگات:
دەبێت سەقامگیرییەکی ئەرێنی بێت کە هاوئاهەنگی تێیدا تەوەرەی سەرەکی بێت و پەیوەندییەکە لەرێگەی ئاڵوگۆڕ و هاوئاهەنگییەوە خۆڕاگرتر بێت. وەک دوو گەورەترین ئابووریی جیهان، چین و ویلایەتە یەکگرتووەکان خاوەنی پەیوەندییەکی قوڵن. هیچ کامێکیان ناتوانێت ئەوی دیکە وەلا بنێت، یان بەبێ ئەوی دیکە گەشە بکات. هەردووکمان لە هاوئاهەنگییەوە سوودمەند دەبین و لە رووبەڕوبوونەوەوە زیانمەند دەبین. لەکاتێکدا پەیوەندییەکی روبەڕوبوونەوەیی بۆ هەردوو وڵات و جیهان کارەساتبار دەبێت، هاوئاهەنگی چین و ئەمریکا زۆر شتی گەورە بۆ بەرژەوەندیی هەردوولا و هەمووان دەکات.
دەبێت سەقامگیرییەکی تەندروست هەبێت کە تێیدا کێبڕکێ لە ناو سنوورە گونجاوەکاندا بمێنێتەوە و نەگۆڕدرێت بۆ یارییەک کە ئەنجامەکەی سفر بێت. کێبڕکێی وڵاتە زلهێزەکان شتێکی نوێ نییە، بەڵام پەیوەندییەکانی چین و ئەمریکا نابێت بە کێبڕکێ پێناسە بکرێن. کاتێک کێبڕکێ رودەدات، دەبێت کێبڕکێیەکی تەندروست بێت کە تێیدا لە یەکترەوە فێر بین، پێکەوە بەدوای باڵادەستیدا بگەڕێین و بە دادپەروەرانە و بەپێی یاساکان کێبڕکێ بکەین. مەبەستی کێبڕکێ دەبێت تێپەڕاندنی خود بێت، تاوەکو هەردوولا باشتر بن.
دەبێت سەقامگیرییەکی بەردەوام بێت کە تێیدا جیاوازییەکان جێگەی بەڕێوەبردن بن و پەیوەندییەکە وەک یاریی "رۆلەر کۆستەر" (هەڵبەز و دابەزی تووند) نەبێت. هەردوولا دەبێت بەردەوامی و سەقامگیریی سیاسەتەکان بپارێزن. زۆر گرنگە بۆ هەردوولا رێز لە قسەکانی خۆمان بگرین و بە هەمان ئاراستەدا بجوڵێین. دیدگایەکی ئەرێنی بۆ هاوکاریی چین و ئەمریکا دڵنیایی زیاتر بۆ گەشەپێدانی هەردوو وڵات و بۆ بارودۆخی نێودەوڵەتی دابین دەکات.
دەبێت سەقامگیرییەکی هەمیشەیی بێت، کە تێیدا ئاشتی چاوەڕوانکراو بێت و ململانێ و جەنگەکان قبوڵکراو نەبن. پێکەوەژیانی ئاشتییانە گەورەترین خاڵی هاوبەشی نێوان چین و ویلایەتە یەکگرتووەکانە. ململانێ و رووبەڕوبوونەوە لە نێوانماندا دەرەنجامگەلێک بەرهەم دەهێنێت کە کەس ناتوانێت بەرگەی بگرێت. خاڵی بنەڕەتی ئەوەیە کە هەردوولا دەبێت پابەندی سێ بەیاننامە هاوبەشەکەی نێوان چین و ئەمریکا بن، رێز لە سیستمە کۆمەڵایەتییەکان و رێڕەوەکانی گەشەپێدانی یەکدی بگرن، رێز لە بەرژەوەندییە بنەڕەتییەکان و نیگەرانییە سەرەکییەکانی یەکدی بگرن، و رێز لە مافی گەشەپێدانی یەکدی بگرن.
دووەم، بەدیهێنانی بوژانەوەی مەزنی نەتەوەی چین و "دووبارە مەزنکردنەوەی ئەمریکا" دەتوانن شانبەشانی یەکدی بڕۆن و هەردوو وڵات دەتوانن یارمەتی یەکدی بدەن بۆ سەرکەوتن و پێشخستنی خۆشگوزەرانی هەموو جیهان. لەکاتێکدا گۆڕانکارییەک کە لە سەدەیەکدا نەبینراوە لە سەرانسەری جیهاندا خێرا دەبێت، جیهان جارێکی دیکە گەیشتووەتە چواررێیانێک.
سەرۆک شی هەندێک پرسیاری گرنگی وروژاند: ئایا چین و ویلایەتە یەکگرتووەکان دەتوانن بەسەر تەڵەی توسییدیدسدا زاڵ بن و نموونەیەکی نوێ بۆ پەیوەندیی وڵاتە زلهێزەکان دروست بکەن؟ ئایا دەتوانین رووبەڕوی تەحەدا جیهانییەکان ببینەوە و سەقامگیریی زیاتر بۆ جیهان دابین بکەین؟ ئایا دەتوانین پێکەوە ئایندەیەکی گەش بۆ پەیوەندییە دووقۆڵییەکانمان بونیاد بنێین لە پێناو بەرژەوەندی و خۆشگوزەرانی هەردوو گەل و ئایندەی مرۆڤایەتی؟ ئەم پرسیارانە بۆ مێژوو، بۆ جیهان و بۆ گەل زۆر گرنگن. ئەوانە پرسیارەکانی سەردەمی ئێمەن کە سەرکردە چینی و ئەمریکییەکان پێویستە پێکەوە وەڵامیان بدەنەوە.
هەردوو سەرۆک گفتوگۆی قوڵیان لەسەر پەیوەندییە ئابووری و بازرگانییەکانی چین و ئەمریکا هەبوو. سەرۆک شی جەختی کردەوە کە پەیوەندی ئابووری و بازرگانی لە سروشتی خۆیاندا سودبەخشی دووقۆڵین و "بردنەوە-بردنەوە"ن. لەو شوێنەی جیاوازی و بەریەککەوتن هەبێت، راوێژی یەکسان تەنیا رێگەی دروستە. هەردوولا رێککەوتن لەسەر دامەزراندنی ئەنجوومەنێکی بازرگانی و ئەنجوومەنێکی وەبەرهێنان، بۆ چارەسەرکردنی نیگەرانییەکانی یەکدی سەبارەت بە گەیشتن بە بازاڕ بۆ بەرهەمە کشتوکاڵییەکان و فراوانکردنی بازرگانیی دووقۆڵە لە چوارچێوەی کەمکردنەوەی باجی گومرگیی هاوبەشدا.
زۆر لە سەرکردە بازرگانییەکانی ئەمریکا لەم گەشتەدا هاوەڵی سەرۆک ترهمپ بوون و ئەو تەنانەت بانگهێشتی کردوون بۆ ناو گفتوگۆ فەرمییەکان. سەرۆک شی لەگەڵ هەر یەکێکیاندا قسەی کرد، هانی دان بۆ بەهێزکردنی هاوئاهەنگی لەگەڵ چین و جەختی کردەوە کە چین دەرگاکانی خۆی زیاتر واڵا دەکات. سەرۆکوەزیران لی چیانگیش لەگەڵ سەرکردە بازرگانییەکانی ئەمریکا کۆبووەوە. هەموویان گوتیان کە پابەندییەکی قوڵیان بە بازاڕی چینەوە هەیە و دەیانەوێت کارەکانیان لە چین گەشە پێ بدەن و هاوئاهەنگی لەگەڵ هاوبەشە چینییەکان بەهێز بکەن. روونە کە چین وەک شوێنێکی زۆر گونجاو بۆ کار و وەبەرهێنەرانی ئەمریکی دەمێنێتەوە.
هەردوولا رێککەوتن لەسەر ئاڵوگۆڕی زیاتر لە سیاسەتی دەرەوە، پەیوەندییە سەربازییەکان، ئابووری و بازرگانی، تەندروستیی گشتی، کشتوکاڵ، گەشتوگوزار، پەیوەندیی نێوان گەلان و جێبەجێکردنی یاسا. لووتکەکە هەروەها ئاڵوگۆڕی نێوان دەزگا یاسادانەرەکان، قەوارە خۆجێییەکان و کۆمەڵگەکانی بازرگانی، ئەکادیمی و میدیایی چالاک دەکاتەوە. سەرۆک شی پێشوازی لە گەنجانی زیاتری ئەمریکی دەکات بۆ سەردانکردن و خوێندن لە چین. سەرۆک ترهمپیش گوتی کە پێشوازی لە قوتابیانی چینی دەکات بۆ ویلایەتە یەکگرتووەکان. هەردوولا رێککەوتن لەسەر پشتگیریکردنی یەکدی لە میوانداریکردنی کۆبوونەوەی سەرکردە ئابوورییەکانی APEC و لوتکەی G20ی ئەمساڵدا.
سێیەم، پرسی تایوان. بابەتێکی گرنگ بوو کە لە لووتکەکەدا وروژێندرا. هەڵوێستی چین زۆر روونە:
یەکەم، پرسی تایوان بابەتێکی ناوخۆیی چینە. بەدیهێنانی یەکگرتنەوەی تەواو ئاواتێکی هاوبەشی هەموو کوڕان و کچانی نەتەوەی چینە. هەروەها ئەرکێکی مێژوویی و نەگۆڕی پارتی کۆمۆنیستی چینە. خاکی سەرەکی و تایوان سەر بە یەک چینن. ئەمە راستییەکە کە لە کۆنەوە چەسپاوە، دۆخی راستەقینەی ئێستای تەنگەی تایوانە و بەشێکی گرنگە لە سیستەمی نێودەوڵەتیی دوای جەنگ.
دووەم، پرسی تایوان گرنگترین بابەتە لە نێوان چین و ئەمریکا، کە کاریگەری لەسەر تەواوی پەیوەندییەکە هەیە. ئەگەر بە دروستی مامەڵەی لەگەڵ بکرێت، پەیوەندییە گشتییەکە سەقامگیر دەبێت و هەردوولا دەتوانن وزەی زیاتر بۆ پێشخستنی هاوکاریی سودبەخشی هاوبەش تەرخان بکەن. ئەگەر نا، هەردوو وڵات رووبەڕووی پێکدادان و تەنانەت ململانێ دەبنەوە و تەواوی پەیوەندییەکە دەکەوێتە مەترسییەکی گەورەوە.
سێیەم، چین و ئەمریکا هەردوولا هاوڕان لەسەر گرنگیی ژیانیی پاراستنی ئاشتی و سەقامگیری لە سەرانسەری تەنگەکەدا. بۆ دڵنیابوون لەمە، نابێت هەرگیز چاوپۆشی یان پشتیوانی لە "سەربەخۆیی تایوان" بکرێت، چونکە "سەربەخۆیی تایوان" و ئاشتیی تەنگەکە وەک ئاگر و ئاو وان و پێکەوە ناگونجێن.
هەستی ئێمە دوای لوتکەکە ئەوەیە کە لایەنی ئەمریکی لە هەڵوێستی چین تێدەگات، نیگەرانییەکانی چین بە جدی وەردەگرێت و وەک تەواوی کۆمەڵگەی نێودەوڵەتی، هاوڕا نییە و قبوڵی ناکات تایوان بەرەو سەربەخۆیی بجوڵێت.
لێرەدا دەمەوێت جەخت بکەمەوە کە پرەنسیپی "یەک چین" نەک تەنیا بنەمای سیاسیی پەیوەندییەکانی چین و ئەمریکایە، بەڵکو نەریتێکی بنەڕەتیی پەیوەندییە نێودەوڵەتییەکان و کۆدەنگییەکی گشتگیری کۆمەڵگەی نێودەوڵەتییە. تاوەکو ئێستا 183 وڵات لە سەرانسەری جیهاندا لەسەر بنەمای ئەم پرەنسیپە پەیوەندیی دیپلۆماسییان لەگەڵ چین دامەزراندووە. ئێمە هیوادارین حکومەتی هەرێمی کوردستان و خەڵکەکەی لە هەموو چین و توێژەکانەوە، بە تووندی پابەندی پرەنسیپی "یەک چین" بن، پێکەوە پارێزگاری لە دەسەڵاتی بڕیارنامەی 2758ی کۆمەڵەی گشتیی نەتەوە یەکگرتووەکان بکەن، پابەندی مەبەست و بنەماکانی پەیماننامەی نەتەوە یەکگرتووەکان بن و پێکەوە کار بکەن بۆ پاراستنی سیستەمی نێودەوڵەتی و ئاشتیی جیهانی.
چوارەم، بارودۆخی رۆژهەڵاتی ناوەڕاست. سەرۆک شی هەڵوێستی نەگۆڕی چینی خستە روو. ئەو جەختی کردەوە کە بەکارهێنانی هێز ناتوانێت کێشەکان چارەسەر بکات، و دیالۆگ تەنیا هەڵبژاردنی دروستە. رەنگە دانوستاندن ئەنجامی دەستبەجێی نەبێت، بەڵام ئێستا کە دەرگای دیالۆگ کراوەتەوە، نابێت جارێکی دیکە دابخرێتەوە. چین هانی ئەمریکا و ئێران دەدات بەردەوام بن لە چارەسەرکردنی جیاوازی و ناکۆکییەکانیان لەرێگەی دانوستاندنەوە، بە پرسی ئەتۆمیشەوە. چین داوای کردنەوەی تەنگەی هورمز دەکات لە زوترین کاتدا لەسەر بنەمای بەردەوامیی ئاگربەست و پێی وایە چارەسەری بنەڕەتی بۆ بنبەستی ناو تەنگەکە لە بەدیهێنانی ئاگربەستێکی هەمیشەیی و گشتگیردایە. چین کاری کردووە بۆ برەودان بە گفتوگۆکانی ئاشتی، و بەردەوام دەبێت لە گێڕانی رۆڵی خۆی بۆ کۆتاییهێنان بە ململانێکە و گەڕاندنەوەی ئاشتی بۆ رۆژهەڵاتی ناوەڕاست.
لوتکەی چین و رووسیا
یەکەم، هەردوولا متمانەی سیاسیی بەرامبەر قوڵ دەکەنەوە و پێکەوە کار دەکەن بۆ دانانی نموونەیەک بۆ پەیوەندیی وڵاتە زلهێزەکان. وەک سەرۆک شی جەختی کردەوە، ئەمساڵ یادی 30 ساڵەی دامەزراندنی هاوبەشیی ستراتیژیی هەماهەنگیی چین و رووسیایە. لە ماوەی سێ دەیەی رابردوودا، پەیوەندیی چین و رووسیا رووبەڕووی ئاڵنگارییەکان بووەتەوە و لەگەڵ سەردەم رۆیشتووە و، پێگەی پەیوەندییە دووقۆڵییەکان بەردەوام بەرز بووەتەوە، گەیشتووەتە ئاستێکی مێژوویی بەرزی هاوبەشیی ستراتیژیی گشتگیر بۆ سەردەمێکی نوێ. ئەمساڵ یادی 25 ساڵەی واژۆکردنی پەیماننامەی دراوسێیەتی باش و هاوکاریی دۆستانەی نێوان چین و رووسیایە. بۆ چەندین ساڵ، هەردوو وڵات بە تووندی پابەندی پرەنسیپەکانی "هاوپەیمان نەبوون، رووبەڕوونەبووە و بە ئامانجنەکردنی لایەنی سێیەم" بوون وەک لە پەیماننامەکەدا هاتووە. سەرۆک پووتین گوتی، پەیوەندییەکانی رووسیا و چین ئێستا لە ئاستێکی بەرزی بێوێنەدان. گەشەکردنی پەیوەندییەکانی رووسیا و چین هێزێکی ناوەکیی بەهێزی هەیە؛ هاوکاریی نێوان هەردوو وڵات ئاراستەی هیچ لایەنێکی سێیەم نەکراوە و لەژێر کاریگەریی گۆڕانکارییە جیۆپۆلیتیکییەکاندا نییە. هەردوو سەرۆک رێککەوتن لەسەر درێژکردنەوەی پەیماننامەی دراوسێیەتی باش و هاوکاریی دۆستانەی نێوان چین و رووسیا.
دووەم، هەردوولا دەرفەتە مێژوییەکان دەقۆزنەوە و هاوکاریی دراوسێیەتی باش و دۆستانە بە شێوەیەکی گشتگیر قوڵ دەکەنەوە. لە ساڵانی رابردوودا، هاوکاریی نێوان چین و رووسیا لە بوارە جیاوازەکاندا وەک بازرگانی و ئابووری، وەبەرهێنان، وزە، زانست و تەکنەلۆژیا، ئاڵوگۆڕی نێوان گەلان و ناوچەیی بەردەوام بووە و پەیوەندیی نێوان هەردوو گەل بەهێزتر بووە.
سەرۆک شی جەختی کردەوە کە پێویستە هەردوولا وزەی خۆیان بەکاربهێنن، هاوتەریبی نێوان پلانی 15یەمینی پێنج ساڵەی چین (2026-2030) و ستراتیژیی گەشەپێدانی رووسیا تاوەکو 2030 قوڵتر بکەن، میکانیزمی هاوکاریی چین و رووسیا بە تەواوەتی بەکاربهێنن و پەرە بە بەرزکردنەوەی ئاستی هاوکارییە سودبەخشە هاوبەشەکان بدەن لە بوارە جیاوازەکاندا. لە کاتی ئەم لووتکەیەدا، هەردوو سەرۆک بەیاننامەیەکی هاوبەشیان لەسەر بەهێزکردنی زیاتری هاوئاهەنگی ستراتیژیی گشتگیر و قوڵکردنەوەی دراوسێیەتی باش واژۆ و بڵاوکردەوە. هەروەها شایەتی واژۆکردنی 20 بەڵگەنامەی هاوکاری بوون لە بوارەکانی ئابووری و بازرگانی، پەروەردە، و زانست و تەکنەلۆژیا. هەردوو سەرۆک بڕیاریان دا "ساڵی پەروەردەی چین و رووسیا" لەمساڵەوە بۆ ساڵی داهاتوو رێکبخەن.
سێیەم، هەردولا پارێزگاری لە دادپەروەری و رەوایی دەکەن و سەرکردایەتیی ریفۆرمی سیستەمی حوکمڕانیی جیهانی دەکەن. سەرۆک شی رایگەیاند، وەک ئەندامی هەمیشەیی ئەنجوومەنی ئاسایشی نەتەوە یەکگرتووەکان و وڵاتە زلهێزە گرنگەکانی جیهان، چین و رووسیا دەبێت بە تووندی بەرپرسیارێتییەکانیان وەک زلهێز جێبەجێ بکەن و پارێزگاری لە دەسەڵاتی نەتەوە یەکگرتووەکان و دادپەروەریی نێودەوڵەتی بکەن. هەردوولا دەبێت دژی هەموو شێوازەکانی چەوسانەوەی تاکلایەنە و ئەو کردەوانە بوەستنەوە کە دەیانەوێت رەوتی مێژوو پێچەوانە بکەنەوە، بەتایبەتی ئەو دنەدانانەی ئەنجامەکانی جەنگی جیهانیی دووەم رەتدەکەنەوە و هەوڵی سپیکردنەوە و زیندووکردنەوەی فاشیزم و میلیتاریزم دەدەن؛ پێکەوە کار بۆ بونیادنانی سیستەمێکی دادپەروەرانەتر بۆ حوکمڕانیی جیهانی بدەن. سەرۆک پووتین جەختی کردەوە کە هاوکاریی دووقۆڵیی رووسیا و چین فاکتەرێکی گرنگی سەقامگیرییە لە بارودۆخی ناجێگیری نێودەوڵەتیدا و رووسیا ئامادەیە لەگەڵ چین کار بکات بۆ پاراستنی دەسەڵاتی نەتەوە یەکگرتووەکان. هەردوولا بەیاننامەیەکی هاوبەشیان لەسەر برەودان بە جیهانێکی فرە جەمسەر و جۆرێکی نوێ لە پەیوەندییە نێودەوڵەتییەکان بڵاوکردەوە.