ئەنەکەسە و نوێنەری فەرەنسا لە قامشلۆ کۆدەبنەوە

سەرچاوەیەکی ئاگادار بە تۆڕی میدیایی رووداوی گوت "ئەمڕۆ (سێشەممە، 24-12-2024) شاندێکی ئەنجوومەنی نیشتمانیی کورد لە سووریا (ئەنەکەسە) لەگەڵ نوێنەری فەرەنسا کۆدەبێتەوە." 

ئەم کۆبوونەوەیە، دوای کۆبوونەوەکەی دوێنێی هەسەدە و ئەنەکەسە دێت، کە نوێنەرانی ئەمریکا و فەرەنسا تێیدا ئامادەبوون. سەرچاوەکەی رووداو دەڵێت "کۆبوونەوەی ئەمڕۆش بۆ تاوتوێکردنی یەکهەڵوێستی و یەکدەنگیی کوردە." 

دوای کۆبوونەوەکەی ئەنەکەسە و مەزڵووم عەبدی، فەرماندەی گشتیی هەسەدە، ئەنەکەسە لە راگەیێندراوێکدا گوتی کۆبوونەوەکە بۆ دروستکردنی هەڵوێستێکی یەکگرتووی کورد بووە لە چوارچێوەی سووریای نوێدا.

فەرماندەی گشتیی هەسەدەش راگەیێندراوێکی لە بارەی کۆبوونەوەکە بڵاوکردەوە و رایگەیاند "پرسی یەکڕیزیی کورد لە رۆژئاوای کوردستان گفتوگۆی لەسەر کرا."

فەیسەڵ یوسف، گوتەبێژی ئەنەکەسە، دوای تەواوبوونی کۆبوونەوەکە بە تۆڕی میدیایی رووداوی راگەیاندبوو "کۆبوونەوەی ئەنەکەسە و مەزڵووم عەبدی ئەرێنی بوون و رێککەوتین دیالۆگ بەردەوام بێت. لە ماوەیەکی نزیکدا کۆبوونەوەی دیکە لە نێوان هەردوولا دەکرێت." 

تاوەکو ئەمڕۆ، کاتی دووەم کۆبوونەوە دیاری نەکراوە.