رووداو دیجیتاڵ
دۆناڵد ترەمپ، سەرۆکی ئەمریکا دوای راگەیاندنی ئاگربەستێکی دوو هەفتەیی لەگەڵ تاران، لە پەیوەندییەکی تەلەفۆنیدا لەگەڵ ئاژانسی فرانس پرێس رایگەیاند، ئەمە "سەرکەوتنێکی تەواو و گشتگیرە" و جەختی لە رۆڵی چین و چارەنووسی یۆرانیۆمی ئێران کردەوە.
لەکاتی پرسیارکردن لێی کە ئایا دەتوانێت دوای ئەم رێککەوتنە سەرکەوتن رابگەیێنێت، ترەمپ بە دڵنیاییەوە وەڵامی دایەوە و گوتی، "بەڵێ، سەرکەوتنێکی تەواو و گشتگیرە. 100٪. هیچ بچووکترین گومانێک لەوەدا نییە."
سەبارەت بەو خاڵانەی کە هێشتا یەکلایی نەکراونەتەوە، بەتایبەتی پرسی تەنگەی هورمز، ترەمپ ئاماژەی بەوە کرد کە رێککەوتنێکی 15 خاڵییان لەبەردەستە و لەسەر زۆربەی خاڵەکان رێککەوتوون. سەرۆکی ئەمریکا گوتی، "با بزانین چی روودەدات و ئایا ئەوانە بەدی دێن یان نا." کاتێکیش پرسیاری لێکرا ئەگەر رێککەوتنی کۆتایی نەکرێ، ئایا دەگەڕێتەوە سەر هەڕەشەکانی پێشووی بۆ وێرانکردنی ژێرخانی ئێران، ترەمپ تەنیا گوتی: "ئەوە شتێکە کە دەبێت چاوەڕێ بکەین تاوەکو بیزانن."
سەرۆکی ئەمریکا پشتڕاستی کردەوە کە چین رۆڵی هەبووە لە رازیکردنی ئێران بۆ چوونە سەر مێزی دانوستاندن و بەشداری لەم رێککەوتنەدا.
یەکێک لە تەوەرە هەرە گرنگەکانی گفتوگۆکە پرسی یۆرانیۆمە پیتێنراوەکەی ئێران بوو. لەمبارەیەوە ترەمپ دڵنیایی دا کە ئەو بابەتە "بە باشترین شێوە مامەڵەی لەگەڵ دەکرێ" و گوتی: "ئەگەر ئەو بابەتە چارەسەر نەکرایە، من هەرگیز بەم رێککەوتنە رازی نەدەبووم."
ئەم لێدوانانەی ترەمپ لە کاتێکدا دێن کە بڕیارە رۆژی هەینی نوێنەرانی ئەمریکا و ئێران لە پاکستان کۆببنەوە تاوەکو گفتوگۆ لەسەر وردەکارییەکانی رێککەوتنی کۆتایی بۆ کۆتاییهێنان بە جەنگ بکەن.
دەقی پرسیار و وەڵامەکانی دۆناڵد ترەمپ و فرانس پرێس:
پرسیار: دەتوانیت سەرکەوتن رابگەیێنیت، دوای رێککەوتنی ئاشتیی ئەمڕۆ لەگەڵ ئێران؟
ترەمپ: بەڵێ، سەرکەوتنێکی تەواو و گشتگیر.
بابەتی پەیوەندیدار
100٪. هیچ بچووکترین گومانێک لەوەدا نییە.
پرسیار: وادیارە زۆر شت هێشتا یەکلایی نەبوونەتەوە، بۆ نموونە ئەوەی کە پەیوەندی بە تەنگەی هورمزەوە هەیە؟
ترەمپ: نازانم. زۆر خاڵ هەن. ئێمە رێککەوتنێکی 15 خاڵیمان هەیە کە لەسەر زۆربەیان رێککەوتووین. با بزانین چی روودەدات. با بزانین ئایا ئەوە بەدی دێت یان نا.
پرسیار: ئەی ئەگەر رێککەوتن نەکرێ چی دەبێت؟ ئایا دەگەڕێیتەوە سەر هەڕەشەکانی پێشووت؟
ترەمپ: باشە، ئەوە شتێکە کە دەبێت چاوەڕێ بکەن تاوەکو بیزانن.
پرسیار: پرسیارێکی دیکە جەنابی سەرۆک. ئایا چین رۆڵی هەبوو لە رازیکردنی ئێران بۆ بەشداریکردن لەم رێککەوتنەدا؟
ترەمپ: بەو جۆرە گوێم لێبووە کە بەڵێ. بەڵێ، رۆڵیان هەبووە.
پرسیار: ئەی چارەنووسی یۆرانیۆمەکە چی دەبێت؟
ترەمپ: ئەو بابەتە بە باشترین شێوە مامەڵەی لەگەڵ دەکرێت، ئەگەر نا من بە رێککەوتنەکە رازی نەدەبووم."
پرسیار: زۆر باشە. ئەگەر رێگەم بدەیت بپرسم؛ ئەوە چۆن دەبێت؟
ترەمپ: بە رێککەوتنەکە رازی نەدەبووم.